Soltústik Qazaqstan oblysynyń ákimi bazardaǵy baǵalardy tekserdi
PETROPAVL. QazAqparat - Soltústik Qazaqstan oblysynyń ákimi Qumar Aqsaqalov Petropavl bazarlarynda boldy, dep habaralaıdy «QazAqparat» HAA tilshisi óńir basshysynyń baspasóz qyzmetine silteme jasap.
Qumar Aqsaqalov «Kommýnaldyq», «Darııa», «Ońtústik» bazarlary men «Otbasylyq» gıpermarketine baryp, kúndelikti tutynylatyn ónimderdiń baǵasyn qarap shyqty. Ásirese, kartoptyń baǵasyna erekshe nazar aýdaryldy. Qazan aıynda onyń quny 130 teńgege deıin sharyqtaǵan bolatyn.
Taldaý nátıjesi boıynsha anyqtalǵandaı, bul - kartopty bazarlarǵa jáne qalanyń saýda núktelerine jetkizetin deldaldardyń sóz baılasýy jáne alypsatarlyq áreketterine baılanysty bolǵan.
Baspasóz qyzmetinen habarlaǵandaı, «Soltústik» áleýmettik-kásipkerlik korporatsııasy áleýmettik mańyzy bar azyq-túlikterdiń baǵasyn retteý úshin 800 tonna kartop, 100 tonna sábiz, 100 tonna pııaz jáne 100 tonna oramjapyraq satyp aldy.
«Qazir bazarda kartoptyń baǵasy - 75 teńge, oramjapyraq - 55 teńge, pııaz - 90 teńge, sábiz 88 teńge turady. Ár aýdanda rezervte 100 tonna kartop pen qajetti basqa da kókónister bar», - dep atap ótti SQO ákiminiń baspasóz qyzmetinen.
