Soltústik Qazaqstan oblysynda tótenshe jaǵdaı jarııalandy

Soltústik Qazaqstan oblysynda tótenshe jaǵdaıdy engizý týraly

Soltústik Qazaqstan oblysy turǵyndarynyń qaýipsizdigin qamtamasyz etý maqsatynda Qazaqstan Respýblıkasy Konstıtýtsııasynyń 44-babynyń 16) tarmaqshasyna, «Tótenshe jaǵdaı týraly» Qazaqstan Respýblıkasy Zańynyń 4, 5, 6-baptaryna sáıkes QAÝLY ETEMІN:

1. Azamattardyń mańyzdy jáne tikeleı qaýipsizdigine baılanysty qoǵamdyq qaýipsizdikti qamtamasyz etý, zańdylyq pen quqyqtyq tártipti qalpyna keltirý, azamattardyń quqyqtary men bostandyqtaryn qorǵaý maqsatynda 2022 jylǵy 5 qańtardaǵy 22 saǵat 00 mınýt pen 2022 jylǵy 19 qańtardaǵy 00 saǵat 00 mınýt merzimi kezeńinde Soltústik Qazaqstan oblysynyń shekaralarynda tótenshe jaǵdaı engizilsin.

2. Soltústik Qazaqstan oblysynda tótenshe jaǵdaıdyń kúshinde bolýy kezeńinde 23 saǵat 00 mınýttan 7 saǵat 00 mınýtqa deıin komendanttyq saǵat engizilsin.

3. Tótenshe jaǵdaıdyń kezeńinde Soltústik Qazaqstan oblysynyń komendatýrasy qurylyp, oǵan «Tótenshe jaǵdaı týraly» Qazaqstan Respýblıkasynyń Zańymen kózdelgen ókilettikter berilsin.

Soltústik Qazaqstan oblysynyń komendanty bolyp Soltústik Qazaqstan oblysy Polıtsııa departamentiniń bastyǵy Marat Saǵyntaıuly Tólebaev taǵaıyndalsyn.

4. Tótenshe jaǵdaıdyń kúshinde bolýy kezeńinde mynadaı sharalar men ýaqytsha shekteýler engizilsin:

1) qoǵamdyq tártiptiń saqtalýy, asa mańyzdy memlekettik jáne strategııalyq obektilerdiń, sondaı-aq halyqtyń tynys-tirshiligin jáne kólik qyzmetiniń jumys isteýin qamtamasyz etetin obektilerdiń kúzetilýi kúsheıtilsin;

2) Soltústik Qazaqstan oblysynda júrip-turý, onyń ishinde kólik quraldary qozǵalysynyń erkindigine shekteýler belgilensin;

3) jeke tulǵalardyń jeke basyn kýálandyratyn qujattardy tekserý, olardy jeke tekserý, olardyń zattaryn, kólik quraldaryn tekserý qamtamasyz etilsin;

4) Soltústik Qazaqstan oblysyna kirý, sondaı-aq odan shyǵý shektelsin;

5) beıbit jınalystardy, oıyn-saýyq, sporttyq jáne basqa da buqaralyq is-sharalardy uıymdastyrýǵa jáne ótkizýge tyıym salynsyn;

6) ereýilderge jáne zańdy tulǵalardyń qyzmetin toqtata turýdyń nemese toqtatýdyń ózge de ádisterine tyıym salynsyn;

7) qarý, oq-dári, jarylǵysh zattar, arnaýly quraldar, ýly zattar satýǵa tyıym salynsyn, dári-dármektiń, esirtki zattardyń, psıhotroptyq zattardyń, prekýrsorlardyń, sondaı-aq etıl spırtiniń, alkogol ónimderiniń aınalymyna erekshe rejımi belgilensin;

8) jeke tulǵalardan qarý men oq-dárini, ýly zattardy ýaqytsha alyp qoıý, al zańdy tulǵalardan qarýǵa, oq-dárige jáne ýly zattarǵa qosa áskerı jáne jaýyngerlik oqý tehnıkasyn, jarylǵysh jáne radıoaktıvti zattardy ýaqytsha alyp qoıý qamtamasyz etilsin.

5. Tótenshe jaǵdaı rejımi kezinde qoldanylatyn sharalardyń iske asyrylýyna jaýapty bolyp Soltústik Qazaqstan oblysynyń komendatýrasy, Qazaqstan Respýblıkasynyń Іshki ister mınıstrligi, Qazaqstan Respýblıkasynyń Ulttyq qaýipsizdik komıteti, Qazaqstan Respýblıkasynyń Qorǵanys mınıstrligi, Qazaqstan Respýblıkasynyń Tótenshe jaǵdaılar mınıstrligi belgilensin.

6. Qazaqstan Respýblıkasynyń Bas Prokýrory osy Jarlyqta belgilengen sharalar men ýaqytsha shekteýlerdi iske asyrý kezinde zańdylyqtyń saqtalýyn qamtamasyz etsin.

7. Qazaqstan Respýblıkasynyń Úkimeti tótenshe jaǵdaı rejımin qamtamasyz etý úshin Qazaqstan Respýblıkasy Úkimetiniń rezervinen qajetti qarajatty bólsin.

8. Osy Jarlyq qol qoıylǵan kúninen bastap qoldanysqa engiziledi.

Qazaqstan Respýblıkasynyń

Prezıdenti Q.Toqaev

Nur-Sultan, Aqorda, 2022 jylǵy 5 qańtar

№ 745