Soltústik Qazaqstan oblysynda sý deńgeıi tómendedi
ASTANA. QazAqparat - 2017 jyldyń 4 mamyrynda Soltústik Qazaqstan oblysy Sergeeevka sý qoımasyndaǵy sý deńgeıi 993,3 mln tekshe metrden 940,3 mln tekshe metrge deıin tómendedi. Bul týraly «QazAqparat» HAA tilshisi QR ІІM TJ komıtetine silteme jasap habarlaıdy.
«Ótken táýlikterde Aqtóbede buryn evakýatsııalanǵan 1106 adam óz baspanalaryna oraldy. Aqmola, Qyzylorda, Soltústik jáne Ońtústik Qazaqstan oblystarynda eldi mekenderdi sý basý qaýpi áli de saqtalǵandyqtan, jaǵalardy bekitý, ýaqytsha bógetter salý, ınertti materıaldary bar qapshyqtardy qoıý jumystary jalǵasýda jáne Syrdarııa, Esil, Nura ózenderindegi sý deńgeıine baqylaý júrgizilip, táýlik boıǵy kezekshilik uıymdastyryldy. Shyǵys Qazaqstan oblysynyń Besqaraǵaı aýylynda qutqarýshylar jer asty sýlaryn sorǵytyp jatyr», - delingen TJ komıteti taratqan habarlamada.
Apattyq-qutqarý jáne shuǵyl jumystardy júrgizýge respýblıka boıynsha TJ komıteti bólimshelerinen, jergilikti atqarý organdarynan, jergilikti polıtsııa qyzmetinen, Ulttyq gvardııadan jáne ózge uıymdardan 1420 adam, 404 dana tehnıka, 43 sý sorǵytý quraldary jáne 24 júzý quraldary jumyldyryldy. 
