Soltústik Qazaqstan oblysynda ormandar qalpyna keltirilýde
PETROPAVL. QazAqparat - Soltústik Qazaqstan oblysynda «Ormandy qalpyna keltiremiz» ekologııalyq is-sharasy bastaldy, dep habarlaıdy «QazAqparat» HAA tilshisi óńirlik OKQ-ǵa silteme jasap.
Bir kúnniń ishinde orman sharýashylyǵy jáne janýarlar álemi ınspektsııasy, tabıǵı resýrstar jáne tabıǵat paıdalanýdy retteý basqarmasy, tabıǵatty qorǵaý prokýratýrasynyń mamandary men stýdentter Vınogradovskıı ormanshylyǵy aýmaǵynda 3 myń túp qylqanjapyraqty aǵashtar otyrǵyzdy.
Іs-sharanyń basty maqsaty - óńirdegi orman alańyn arttyryp, onyń azaıýyna jol bermeý. Zańǵa sáıkes, orman qoldanýshy bir gektar ormandy keskeni úshin, eki gektar aǵash otyrǵyzýy kerek. Orman qorynda jerdiń bolmaýyna baılanysty aǵash otyrǵyzýdyń ornyna tólem alynady. Mamandardyń aıtýynsha, sonyń nátıjesinde sońǵy bes jylda oblysta 581 gektar orman egilgen, bul 986 fýtbol alańyna sáıkes keledi.
«Buǵan jol bermes úshin barlyq quzyretti organdardyń basyn qosyp, ǵylymdy tarttyq, osy jaǵdaıdy sheshý úshin toptar jınadyq. Aǵash otyrǵyzý úshin 200 gektar jerdi anyqtadyq. Geobotanıkalyq tekseris júrgizip, sonyń kómegimen qaı jerge otyrǵyzý kerektigin jáne qaı jerde kógermeıtinin anyqtadyq», - dep túsindirdi mamandandyrylǵan tabıǵat qorǵaý prokýrory Jaslan Smaǵulov.
«Sokolovskoe» orman sharýashylyǵynyń ınjeneri Natalıa Evsıýkovanyń aqparatyna súıensek, barlyǵy 71 gektar aǵash otyrǵyzylǵan.
«2017 jyly kúzde «Sokolovskoe orman sharýashylyǵy» QMM 50 gektar alańda aǵashtardyń tabıǵı qalpyna keltirilýine jaǵdaı jasaý josparlanyp otyr. Sońǵy 5 jylda orman jamylǵysynyń alańy 130 gektarǵa ósken», - dep atap ótti Natalıa Evsıýkova.
