Soltústik Qazaqstan oblysynda eńbek ónimdiligi 2,5 esege ulǵaıtylmaq

NUR-SULTAN. QazAqparat – Búgin Úkimet otyrysynda QR Aýyl sharýashylyǵy mınıstri Saparhan Omarov Soltústik Qazaqstan oblysynyń 2021-2025 jyldarǵa arnalǵan áleýmettik-ekonomıkalyq damýynyń keshendi jospary AÓK-te qandaı nátıje beretinin aıtty, dep habarlaıdy QazAqparat tilshisi.

«Sondyqtan jańa Soltústik Qazaqstan oblysyn damytýdyń 2025 jylǵa deıingi jańa keshendi jospary jobasynda agroónerkásiptik keshendi damytý boıynsha 17 is-shara kózdelgen, onyń ishindegi 10 is-shara – iri ınvestıtsııalyq jobalar.

Aldaǵy bes jylda jalpy qýaty 29,8 myń bas bolatyn 52 taýarlyq sút fermasyn, 3 bordaqylaý alańyn, 2 qus fabrıkasyn, quramajem zaýytyn, jylyjaı keshenin, maı syǵymdaý jáne maı ekstraktsııalyq zaýyttaryn, sondaı-aq jartylaı fabrıkattar shyǵaratyn zaýyt salý josparlanyp otyr», - dedi mınıstr.

Bul jobalardy «Soltústik» áleýmettik-kásipkerlik korporatsııasy arqyly kredıt berý jolymen jáne jeke ınvestıtsııalar tartý esebinen qarjylandyrý boljanyp otyr.

«Bul rette áleýmettik-kásipkerlik korporatsııa arqyly qarjylandyrýdyń usynylyp otyrǵan tetigi óz tıimdiligin kórsetip úlgerdi, oblys ákimdigi ótken jyldan bastap jergilikti bıýdjet qarajaty esebinen kredıt berip keledi. Tek 2020 jyldyń ózinde

4 mlrd teńge somasyna 10 joba qarjylandyryldy. Osynyń arqasynda búginde Soltústik Qazaqstan oblysy taýarlyq sút fermalaryn salý boıynsha kóshbasshy bolyp otyr», - dedi S. Omarov.

Onyń aıtýynsha, ınvestıtsııalyq jobalardy iske asyrý bes jyl ishinde 575 mlrd teńge jeke ınvestıtsııalar tartýǵa múmkindik beredi, bıylǵy jyldyń ózine 129,8 mlrd teńge jeke ınvestıtsııa tartý kózdelgen.

«Keshendi jospar mashına-traktor parkin jańartý boıynsha ındıkatıvti kózdeıdi, 2025 jylǵa qaraı aýyl sharýashylyǵy tehnıkasyn jańartý deńgeıin 6 paıyzǵa deıin jetkizý josparlanýda. Jalpy, Keshendi jospardy iske asyrý oblysta maıly daqyldar alańyn 1 mln gektarǵa deıin, sút óndirisin 1 mln tonnaǵa deıin ulǵaıtýǵa, maıly daqyldardy óńdeý úlesin 14%-dan 30%-ǵa deıin jetkizýge, sút óńdeý kásiporyndaryn júkteýdi 90%-dan 92%-ǵa deıin, al et óńdeý kásiporyndaryn júkteýdi 42%-dan 50%-ǵa deıin ulǵaıtýǵa múmkindik beredi. Nátıjesinde Soltústik Qazaqstan oblysynyń jalpy aýyl sharýashylyǵy ónimderiniń kólemi 1,2 trln-ǵa deıin jetkiziledi, eńbek ónimdiligi 2,5 esege ulǵaıyp, 1,6 myń jumys orny qurylady», - dedi mınıstr.

Aıta keteıik, búgin Úkimet otyrysynda QR Ulttyq ekonomıka mınıstri Áset Erǵalıev Soltústik Qazaqstan oblysynyń 2021-2025 jyldarǵa arnalǵan áleýmettik-ekonomıkalyq damýynyń k eshendi josparyn tanystyrdy. Premer-Mınıstr Asqar Mamın jospar óńirdiń ınfraqurylymyn jaqsartatynyn atap ótti.