Soltústik Qazaqstan oblysynda eki jańa mektep salynady
PETROPAVL. QazAqparat – 2021 jyly Soltústik Qazaqstan oblysynda 1,5 myń adamǵa arnalǵan eki mektep salynady. Olardyń biri Petropavlda, ekinshisi – Taıynsha qalasynda boı kóteredi, dep habarlaıdy QazAqparat.
Sońǵy úsh jylda aımaqta 1,8 myń oqýshyǵa arnalǵan úsh mektep salyndy. Eki jyldyń ishinde 248 bilim mekemesi kúrdeli jóndeýden ótken, bul oblystaǵy mektepterdiń 50 paıyzǵa jýyǵy.
«Oblysymyzda jekemenshik bıznes aýyl mektebine kiristi. Peterfeld orta mektebiniń ǵımaraty jańartylyp, mektep aýmaǵy abattandyryldy, zamanaýı jabdyqtar satyp alyndy.Beskól aýdan ortalyǵynda balabaqsha-mektep-kolledj bilim berý keshenin salý aıaqtalyp qaldy. Oǵan quıylǵan ınvestıtsııa somasy 300 mln teńgeni quraıdy», - dep baıandady oblys ákimi Qumar Aqsaqalov.
Kompıýterlik tehnıkanyń 14 myńnan astam birligi satyp alynǵan. Oblystaǵy barlyq bilim mekemeleri beınebaqylaý júıesimen jabdyqtandyryldy. Barlyq mektepterde jyly dárethanalar salynǵan. Oqýshylardy qaýipsiz jetkizý maqsatynda 34 birlik kólik tehnıkasy satyp alyndy.
Petropavl qalasynyń tórt kolledjinde «Jas maman» jobasy boıynsha tehnıkalyq jáne kásibı bilim berýde oqý-materıaldyq baza jańartyldy, 1,2 mlrd teńgege joǵarytehnologııalyq jabdyqtar satyp alynǵan. 2021 jyly bes kolledjdi 1,4 mlrd teńgege jabdyqtaý josparlanǵan.
«2020 jyly bilim salasyn qarjylandyrý kólemi ótken jylmen salystyrǵanda 33 paıyzǵa ósken. Bul – 87 mlrd astam teńge, nemese oblys bıýdjetiniń 33 paıyzy. Bul jaǵdaı jańa mektepter salyp, olardyń ınfraqurylymyn jaqsartýǵa, materıaldyq bazany nyǵaıtýǵa múmkindik berip otyr», - dep aıtty K.Aqsaqalov.
Eske sala ketsek, buǵan deıin Soltústik Qazaqstan oblysynda 2021 jyly jalpy somasy 2,4 mlrd teńgeni quraıtyn 10 sporttyq nysandy salý josparlanǵany týraly habarlanǵan.
