Soltústik Qazaqstan oblysynda egis naýqany bastaldy

Qatty sý tasqyny soltústikqazaqstandyq sharýalardyń belgilengen agrotehnıkalyq merzimde kóktemgi-egis jumystaryn júrgizýge kedergi keltirmedi.

Oblys ákimi Qumar Aqsaqalov ótken demalys kúnderi jaǵdaıdy sol jerde baǵalaý úshin oblystaǵy egin alqaptaryn aralap shyqqanyn atap ótti.

«Jalpy bıyl jumys isteýge jaǵdaı qolaıly. Jer qurǵaq. Eldi mekenderge qaraǵanda, egis alqabynda sýdyń deńgeıi az. Egisti qolaıly agrotehnıkalyq merzimde aıaqtaý úshin barlyq jaǵdaı jasalǵan dep esepteımiz. Búginde 4,2 mln gektardyń 186 myńy - jazdyq egister, 52 myńy - maıly daqyldar, 121 myńy - dándi daqyldar sebýge, 0,75 myńy - kókónister egýge jumsalady. Kókónisterdi kóbirek ósirý kerek», - dedi óńir basshysy.

Qumar Aqsaqalov Soltústik Qazaqstan oblysy kókónisterdi ońtústikten tasymaldamaı, ózin-ózi qamtamasyz ete alady dep esepteıdi. Buǵan - erte pisetin qııar men qyzanaq kirmeıdi.

«Bizde bári jaqsy ósip jatyr. Biz elimizdi asyraýymyz kerek. Tek sútpen jáne etpen ǵana emes. Aýyl sharýashylyǵy basqarmasy osy salany damytý tujyrymdamasyn jasaýy qajet», - dedi SQO ákimi.

Bıyl óńirde joǵary rentabeldi daqyldar alańy kóbeıedi. Sonyń ishinde, maıly daqyldar alqaby - 200 myń gektarǵa, qant qyzylshasy - 600 gektarǵa, burshaq dándiler alańy - 53 myń gektarǵa ulǵaıady.

Egis naýqanynda 30 myń aýylsharýashylyq tehnıkasy jumyldyrylady.