Soltústik Qazaqstan oblysynda Denge bezgegine shaldyqqan úsh adam tirkeldi
PETROPAVL. QazAqparat - Soltústik Qazaqstan oblysynda jyl basynan beri Denge bezgegine shaldyqqan úsh adam tirkeldi, dep habarlaıdy «QazAqparat» HAA tilshisi.
SQO qoǵamdyq densaýlyqty saqtaý departamenti buǵan masa shaǵý sebep bolǵanyn aıtyp otyr. Atalǵan dertke shaldyqqandardyń ony Taıland jáne Vetnamda demalý kezinde juqtyrǵany anyqtalyp otyr.
«Birinshi jaǵdaı aqpan aıynda tirkelgen. Otbasylyq jup Taılandtan ózderin jaısyz sezinip oralǵan. Olardyń aıtýynsha, ekeýin de meımanhanada masa shaqqan. Úshinshi jaǵdaı qazan aıynda tirkeldi. Bul joly otbasylyq jup Vetnamda demalǵan. Kúıeýi aıaqasty aýyrǵan. Olardyń barlyǵy eki kúndik statsıonardan em aldy. Qazirgi jaǵdaılary bir qalypty. Juqtyrǵan bezgekten keıin densaýlyǵyna qaýip tóndiretin jaǵdaılar joq», - dedi SQO QDSD karantındi nemese asa qaýipti ınfektsııalardy baqylaý epıdemıologııalyq bóliminiń basshysy Tolqyn Qajenova.
Denge bezgegi - masalar arqyly taralatyn vırýsty juqpa. Bul tumaýǵa uqsas aýrý túri. Inkýbatsııalyq kezeń 10 kúnge deıin sozylýy múmkin. Denge bezgeginiń negizgi belgileri: dene qyzýynyń 39-40 gradýsqa deıin artýy, qaltyraý, bulshyq etterdiń, býyndardyń, bastyń aýryrýy, loqsý, keýde jáne arqada qyzamyqqa uqsas usaq bórtpelerdiń paıda bolýy. Adamnan adamǵa juqpaıdy.
