Soltústik Qazaqstan oblysynda burqasyn soǵyp tur
PETROPAVLOVSK. QazAqparat – Soltústik Qazaqstan oblysynda 23 aqpanda kún raıy buzyldy, dep habarlaıdy QazAqparat.
Tańerteńnen jel turyp, boran soqty. 11:30-da aımaqtaǵy barlyq jol jabyldy. Túske taman aıtarlyqtaı kúsheıdi.
«Oblys boıynsha burqasyn soǵyp tur. Taıynsha aýdanynda jeldiń jyldamdyǵy sekýndyna 32 metrge, Petropavlda sekýndyna 25 metrge jetedi. Tsıklon ońtústik-batystan keldi. Erteń tsıklon shyǵysqa qaraı jyljıdy jáne jel basylady. Arktıkalyq antıtsıklon tyl jaǵyna aýysady. Bul aýa temperatýrasynyń tómendeýine ákeledi», – dedi «Qazgıdromet» RMK fılıaly dırektorynyń orynbasary Natalııa Levına.
24 aqpanda óńirde burqasyn bolady. Soltústik-shyǵystan soqqan jeldiń jyldamdyǵy sekýndyna 15-20 metr, keı jerlerde sekýndyna 23-28 metr, uıytqýy sekýndyna 30 metrge jetedi. Aýa temperatýrasy kúndiz 17-22 gradýs aıaz, túnde mınýs 20-25 gradýs.
25 aqpanda keı jerlerde jaıaý burqasyn, qar jaýady. Soltústik-batystan 9-14 metr jyldamdyqpen jel soǵady, keı jerlerde sekýndyna 15-20 metr jyldamdyqpen soǵady. Kúndiz mınýs 23-28 gradýsqa deıin sýytady, túnde – 30-35 aıaz bolady.
26 aqpanda aýa raıy jaýyn-shashynsyz, soltústik-batystan sekýndyna 9-14 metr jyldamdyqpen jel soǵady. Aýa temperatýrasynyń kúndiz mınýs 23-28 gradýsqa deıin, túnde 33-38 gradýsqa deıin tómendeýi boljanýda.
