Soltústik Qazaqstan oblysynda bıyl 13 myń jańa jumys orny qurylady
NUR-SULTAN. QazAqparat - Qazaqstan Respýblıkasy Premer-Mınıstriniń orynbasary Eraly Luqpanuly Toǵjanov Soltústik Qazaqstan oblysyna jumys sapary aıasynda Astrahanka jáne Poltavka aýyldaryna baryp, eldegi jumys kúshi artyq óńirlerden kelgen qonys aýdarýshylarmen kezdesti.
Bul týraly QazAqparat Úkimettiń resmı saıtyna silteme jasap habarlaıdy.
Eraly Toǵjanov ózge aımaqtardan kóship kelgen otbasylardyń ómir súrý jaǵdaıymen tanysty. 2016 jyldan bastap aımaqqa 11 000-nan astam adam kóship kelgen. Eńbekke qabiletti 4,6 myń adamnyń 3,6 myńy jumyspen qamtyldy, kelgenderdiń turaqtap qalý kórsetkishi-94%.
Osy baǵdarlamanyń arqasynda 5 jyl ishinde kadr tapshylyǵy 2 esege, onyń ishinde aýyl sharýashylyǵynda - 1,5 esege, densaýlyq saqtaýda - 1,3 esege, bilim berýde – 2,5 esege tómendedi.
SQO-ǵa turaqty turýǵa kelgenderdiń biri-Fatıma Nábıeva. Ol soltústikke Mańǵystaý oblysynan kóship kelgen. Qazir jergilikti dárigerlik ambýlatorııada jalpy tájirıbelik dáriger bolyp jumys jasaıdy.
«Soltústik Qazaqstan meni jyly qabyldady. Bul jerdiń klımaty janǵa jaıly jáne ómir súrý úshin jaqsy jaǵdaılar jasalǵan. Meni turǵyn úımen jáne jumyspen qamtamasyz etti. Barlyq qajetti kvotalardy berdi», - dedi Fatıma Nábıeva.
5 jyl ishinde 500-ge jýyq otbasy 270 mln. teńgege granttar men nesıeler alyp, óz isin ashty. Osy jyldyń sońyna deıin oblysqa 2,5 myń adam kóship keledi. Búgingi kúnge deıin 1320 adam keldi, barlyǵyna sýbsıdııa tólendi. Qazirdiń ózinde 200 otbasy óz isin ashýǵa daıyn.
«Biz aýyldardyń damyp kele jatqanynyń naqty mysaldaryn kórip otyrmyz. Qonys aýdarýshylarǵa jan-jaqty kómek kórsetilýde. SQO-ǵa elimizdiń ár óńirinen adamdar kelýde. Almaty, Túrkistan, Mańǵystaý oblystarynan qonys aýdarýshylar bar»,-dedi vıtse-Premer.
Úlgili aýyldardyń biri-Poltavka. Munda «Poltavskoe» JShS óz qarajaty esebinen 40 oryndyq balabaqsha ashty. Qurylysqa 340 mln. teńge baǵyttaldy. 11 jańa jumys orny ashyldy. 30 baladan jınaqtalǵan top quryldy.
Sondaı-aq, kásipkerler aýyl turǵyndarynyń qosalqy sharýashylyǵyn qoldaýdyń tabysty tájirıbesin engizdi. Turǵyndar JShS-ten on kúndik buzaý satyp alyp, olardy ári qaraı satý úshin baǵyp ósire alady. Osylaısha árkim óz qosalqy sharýashylyǵyn nólden bastaı alady.
Odan keıin Premer-Mınıstrdiń orynbasary Petropavlǵa jumys kúshi artyq óńirlerden qonys aýdarǵan bes otbasymen kezdesti. «Alageum Electric» AQ olarǵa qyzmettik turǵyn úı berdi. Kompanııa óz qyzmetkerleri úshin 40 páterlik burynǵy jataqhana ǵımaratyn jóndeýden ótkizdi. Qazir kásiporyn jumysshylar úshin 104 páterlik úı salýda.
Kezdesýlerden keıin Eraly Toǵjanov azamattardyń qonys aýdarýy jáne halyqtyń tabys deńgeıin arttyrý máseleleri boıynsha keńes ótkizdi. Soltústik Qazaqstan oblysynda bıyl 13 myń jańa jumys orny qurylady, búginde 11 myńnan astam jumys orny ashyldy, onyń 72% - y turaqty jumys oryndary.
5 myńnan astam jańa turaqty jumys oryndaryn qura otyryp, 42 ınvestıtsııalyq jobadan 583 mlrd. teńge somasyna pýl quryldy.
Aǵymdaǵy jyly 53 mlrd. teńgege 19 ınvestıtsııalyq joba iske qosylyp, 1 300-den astam turaqty jumys orny ashylady.
Kásipkerlikti damytý jónindegi ulttyq joba sheńberinde azamattardy jumysqa ornalastyrý boıynsha sharalar atqarylýda. Bul maqsatta qarjylandyrý kólemi 1,4 mlrd. teńgeden 6 mlrd. teńgege deıin 4 esege ulǵaıdy.
Jastardy jumyspen qamtý «Birinshi jumys orny», «Jastar praktıkasy» jáne «Urpaqtar kelisimsharty» jobalary sheńberinde júzege asyrylady. Jyl basynan beri oblys boıynsha 3,5 myńnan astam jas jumysqa ornalastyryldy. Jyl sońyna deıin 6 myńnan astam adam qamtylatyn bolady.
Foto: primeminister.kz
