Soltústik Qazaqstan oblysynda bes jyl burynǵy asa aýyr qylmys ashyldy
PETROPAVL. QazAqparat - SQO polıtseıleri 2012 jyly jasalǵan asa aýyr qylmysty áshkereledi, dep habarlaıdy «QazAqparat» HAA tilshisi SQO ІІD baspasóz qyzmetine silteme jasap.
Іz-tússiz joǵalǵan 51 jastaǵy petropavldyq týraly aryz qalalyq ІІB-ǵa 2013 jyldyń basynda týystarynan kelip túsedi. Atalǵan oqıǵa boıynsha izdestirý isi qozǵaldy. Osy ýaqytqa deıin turǵylyqty mekenjaıyn anyqtaý jumystary júrgizildi. Tek aǵymdaǵy jyldyń qańtar aıynda onyń bótelkelesiniń qurbanyna aınalǵandyǵy anyqtaldy.
«2017 jyldyń qańtar aıynda jedel-izdestirý sharalaryn ótkizý barysynda er kisiniń joǵalýyna 1978 jyly týǵan Petroval qalasy turǵynynyń qatysy bary anyqtaldy. Tergeý jumystary barysynda úılerdiń birindegi jertólede joǵalýshynyń máıiti tabyldy. Qazirgi tańda kúdikti qamaýda, óziniń kinásin tolyq moıyndady. QR QK 99-babynyń 2-tarmaǵy boıynsha tergeý jumystary júrgizilýde. Bul bab boıynsha 20 jylǵa deıin bas bostandyǵynan aıyrylýy múmkin», - deıdi Petropavl qalalyq ІІB bastyǵy Anatolıı Mýrzykanov.
Kúdikti - jumyssyz, buryn urlyq jasaǵany úshin sottalǵan. Osy jyldar boıy óziniń qylmysyn jasyryp kelgen. Іshimdik ishkennen keıin oryn alǵan janjaldyń sońy kisi ólimine ushyratqan. Kúdikti máıitten qutylý úshin ony spırttik ishimdik ishken jertólege kómip ketken.
