Soltústik Qazaqstan oblysynda alǵash ret soıa egiledi
PETROPAVL. QazAqparat - Soltústik Qazaqstan oblysynda aýyl sharýashylyǵyn ártaraptandyrý jumystary jalǵasýda. Bıyl óńirde álemdik naryqta úlken suranysqa ıe soıa egiledi, dep habarlaıdy QazAqparat tilshisi.
SQO ákimdiginiń otyrysynda kóktemgi egis jumystaryna daıyndyq barysy pysyqtaldy.
«Bıyl 10 myń gektar aýmaqqa soıa egiledi. Kelesi jyly onyń kólemin 150 myń gektarǵa jetkizemiz. Bıdaıdyń aýmaǵyn azaıtyp, joǵary tabysty ári eksportqa baǵyttalǵan daqyldardy ósiremiz. Soıa úlken suranysqa ıe, qazir naryqta 1 tonnasy 150 myń teńge turady», - dedi oblys ákimi Qumar Aqsaqalov.
Jospar boıynsha topyraqqa 150 myń tonna mıneraldy tyńaıtqysh engiziledi, onyń kólemi 2,7 mln ga quramaq.
«Biz aýyl sharýashylyǵy salasynda tabystarǵa zamanaýı tehnologııalardy júzege asyrýdyń arqasynda jettik. Onyń ishinde tyńaıtqyshtardy qoldaný bar. Biz el boıynsha eń kóp tyńaıtqysh qoldanamyz. Byltyr - 112 myń boldy, bıyl 150 myń tonna alamyz»,- dedi Qumar Aqsaqalov.
Kóktemgi egis naýqanyna 13,6 myń tehnıka jumyldyrylmaq. Bıyl dıqandar 30 mlrd teńgeniń 1,6 myń jańa tehnıkasyn satyp alýdy josparlap otyr. Qazirdiń ózinde 200-ge jýyǵy alynǵan.
Jalpy, bıyl egistik alqaby 4,9 mln ga quramaq. Onyń 4,1 mln ga aýyl sharýashylyǵy daqyldary egiledi. Atap aıtsaq, 2,8 mln ga bıdaı, 1 mln ga maıly daqyldar, jemshóp 369 myń ga sebiledi. Kartop 37 myń ga, kókónis 6,6 myń ga egiledi. ıAǵnı kartop pen ózge de kókónistiń alqaby ózgerissiz qalady
