Soltústik Qazaqstan oblysynda 47 medıtsınalyq nysan salynady
NUR-SULTAN. QazAqparat – Soltústik Qazaqstan oblysynda 47 medıtsınalyq nysan salynady. Bul týraly Soltústik Qazaqstan oblysynyń ákimi Qumar Aqsaqalov Ortalyq kommýnıkatsııalar qyzmetindegi baspasóz máslıhatynda aıtty, dep habarlaıdy QazAqparat tilshisi.
«Oblysty áleýmettik salaǵa kóp qarjy baǵyttalýda. Bıyl 4 mıllıard teńgege 52 bilim berý mekemesi kúrdeli jóndeýden ótti. Zamanaýı zerthanalary bar oqý-zerthana ǵımaratynyń qurylysy jalǵasýda. Áskerı ınstıtýtqa da jańa ǵımarattar salynýda. Álemdegi eń úzdik ýnıversıtetterdiń biri – Arızona ýnıversıtetimen kelissózder júrgizildi. Soltústikqazaqstandyq stýdentter amerıkalyq ýnıversıtettiń tsıfrlyq bilim berý resýrstaryna qol jetkize alady. Qos dıplomdyq bilim berýdi engizý josparlanýda», - dedi ol.
Oblys basshysynyń atap ótýinshe, densaýlyq saqtaý salasynda aýrýhanalar zamanaýı MRT, KT, angıograf jáne rentgen apparattarymen jabdyqtalǵan. Zamanaýı kóp salaly aýrýhana salynýda. «Bereke» jáne «Jas órken» shaǵyn aýdandarynda jańa emhanalar paıda bolady. Aýyldyq jerlerde 47 medıtsınalyq nysannyń qurylysy bastalady.
«Elbasynyń tapsyrmasymen oblysta memlekettik sporttyq tapsyrys júzege asyrylýda. Oblystyq bıýdjetten 200 mıllıon teńge bólindi. Búginde 2 100 bala túrli sport túrlerimen tegin aınalysady. Oblysta sport ınfraqurylymy damyp keledi. Qazir 5 dene shynyqtyrý-saýyqtyrý kesheniniń qurylysy júrip jatyr, eki hokkeı korty ashylady», - dedi Qumar Aqsaqalov.
