Soltústik Qazaqstan oblysynda 40 shetel azamaty elden shyǵaryldy
PETROPAVL. QazAqparat - Ótken jyly Soltústik Qazaqstan oblysynyń polıtseıleri sot úkimimen 40 sheteldik azamatty elden shyǵardy, dep habarlaıdy QazAqparat.
Oblystyq polıtsııa departamentiniń málimetine sensek, SQO polıtseıleri sheteldik azamattardyń elimizde júrip-turý qaǵıdalaryna ózgerister engizilgenin habarlaıdy.
Ózgerister Qazaqstan Respýblıkasy aýmaǵynda koronavırýs ınfektsııasynyń taralýyna jol bermeý jónindegi vedomstvoaralyq komıssııanyń sheshimimen engizildi.
Jol júrý qujatynyń, turaqty turýǵa yqtııarhattyń, QR vızalarynyń, QR ýaqytsha júrip-turýǵa arnalǵan ruqsattyń qoldanylý merzimi ótken nemese ótip bara jatqan sheteldikter men azamattyǵy joq tulǵalardyń 2021 jylǵy 5 maýsymǵa deıin elden shyǵýyna ruqsat etildi.
Olar memlekettik shekaradan ótken kezde ákimshilik jaýapkershilikke tartylmaıdy.
Elde aldaǵy ýaqytta júrip-turýǵa zańdy negiz bolmaǵan jaǵdaıda sheteldikter azamattyǵy bar nemese turaqty turatyn elge ketýi tıis.
Elde júrip-turý merzimi ótip ketkenimen, ary qaraı qalýǵa zańdy negiz bolǵan jaǵdaıda ýaqytsha turýǵa nemese qajetti sanattaǵy vızaǵa ruqsatty resimdeý úshin kóshi-qon qyzmetine júginý qajet.
Budan bólek, otbasymen birigý maqsatynda elde bolý quqyǵyn resimdeıtin sheteldikterge 2021 jylǵy 5 maýsymǵa deıin óz elinen sottylyǵynyń bar-joǵy týraly anyqtamany usyný qajet emes.
QR aýmaǵynda 1 jyldan astam ýaqyt buryn jumysqa kelgender bastapqy eńbek patentin jáne elden shyqpaı ýaqytsha júrip-turýǵa ruqsatty resimdeýi tıis.
– Atalǵan sharalar sheteldikterge ruqsat resimdeýdi jeńildetedi jáne karantındik shekteýlerge baılanysty kóshi-qon zańnamasynyń talaptaryn oryndaı almaǵan sheteldikterdi ákimshilik jaýapkershilikten bosatady. QR zańnamasyn buzýǵa jıi jol bergen nemese karantındik sharalar men tótenshe jaǵdaı rejımi jarııalanbaı turyp, elde bolý merzimderin buzǵan sheteldikter jaýapkershilikke tartylady. Ákimshilik materıaldar elden shyǵarý máselesin sheshý úshin sotqa joldanatyn bolady. Ótken jyly oblys boıynsha 40 sheteldik elden shyǵaryldy, 226-sy ákimshilik jaýapkershilikke tartyldy. Jalpy 2020 jyly SQO-da 8 myńnan astam sheteldik tirkeldi, – deıdi SQO polıtsııa departamenti kóshi-qon qyzmeti basqarmasynyń bastyǵy Talǵat Ábilov.
