Soltústik Qazaqstan oblysynda 2 orman órti aýyzdyqtaldy
ASTANA. Qyrkúıektiń 27-si. QazAqparat - Soltústik Qazaqstan oblysyna qarasty Qaratomar orman sharýashylyǵynyń 2 aýmaǵynda orman órti oryn aldy, dep habarlady QR Tótenshe jaǵdaılar mınıstrliginiń baspasóz qyzmetinen.
Senbi kúni keshki saǵat 8-de 110-shy oramda jalpy aýmaǵy 50 gektardy quraıtyn orman órtendi. Tilsiz jaý tún ortasynda aýyzdyqtaldy.
Sondaı-aq senbiden jeksenbige qaraǵany túni dál osy oramda 38,2 gektar orman alqaby órt qushaǵyna orandy. Qyzyl jalyn tańerteń sóndirildi.
Eki órtti sóndirýge Soltústik Qazaqstan oblystyq tótenshe jaǵdaılar departamenti órt sóndirý qyzmetiniń jeke quramyndaǵy 21 maman men 4 tehnıka jumyldyryldy. TJM aqparatyna sáıkes, eki oqıǵa barysynda da zardap shekkender men qaza tapqandar bolǵan joq.
