Soltústik Qazaqstan oblysynda 14 myń jańa jumys orny ashylady
ASTANA. QazAqparat - Petropavlda QR Premer-Mınıstriniń birinshi orynbasary Asqar Mamınniń tóraǵalyǵymen Soltústik Qazaqstan oblysyn damytý jónindegi jumys tobynyń otyrysy ótkizildi, dep habarlaıdy QazAqparat.
QR Premer-Mınıstriniń baspasóz qyzmeti habarlaýynsha, Asqar Mamın Memleket basshysy N.Nazarbaevtyń Soltústik Qazaqstan oblysyn odan ári damytý jónindegi tapsyrmasyn oryndaýdyń mańyzdylyǵyna toqtaldy. Soǵan oraı, oblysty áleýmettik-ekonomıkalyq damytý máselesin jan-jaqty talqylap, tıisti sheshimder qabyldaý úshin, memlekettik organdardyń qatysýymen jumys toby quryldy.
Soltústik Qazaqstan oblysynyń ákimi Qumar Aqsaqalovtyń aıtýynsha, oblysty áleýmettik-ekonomıkalyq damytýdyń 2018-2021 jyldarǵa arnalǵan keshendi jospary túzilgen. Jospar jobasy ınfraqurylymdyq 12 baǵytty qamtıdy. Onyń ishinde áleýmettik nysandar qurylysy, kólik jáne ınjenerlik kommýnıkatsııalardy damytý, agroónerkásip kesheniniń óńdeý qýatyn kóterý, qorǵanys kesheni kásiporyndaryn jańǵyrtý kózdeledi.
Jalpy alǵanda 64 sharany júzege asyrý qarastyrylǵan. Ol arqyly shamamen 14 myń jańa jumys ornyn ashý josparlanyp otyr. Soltústik Qazaqstan oblysyn damytýdyń keshendi jospary 300 mlrd. teńgeden astam ınvestıtsııalyq jobalardy júzege asyrýdy qamtıdy.
Jumys tobynyń otyrysy barysynda atqarylyp jatqan jumystar jóninde ulttyq ekonomıka vıtse-mınıstri A.Jumaǵulov, qorǵanys jáne aeroǵarysh ónerkásibi mınıstri B.Atamqulov jáne basqa da memlekettik organdardyń basshylary baıandady.
«Soltústik Qazaqstan oblysyn 2018-2021 jyldarǵa arnalǵan Keshendi damytý josparyn jasaý - Memleket basshysy N.Nazarbaevtyń tikeleı tapsyrmasy. Atalmysh qujatty júzege asyrý SQO áleýmettik-ekonomıkalyq damytýǵa zor serpin berip, turǵyndardyń ómir súrý sapasyn kóteredi», - dep atap ótti A. Mamın.
Jumys tobynyń otyrysyn qorytyndylaı kelip, Premer-Mınıstrdiń birinshi orynbasary ulttyq ekonomıka mınıstrligi men Soltústik Qazaqstan oblysy ákimdigi birlese otyryp, talqylaý nátıjesi boıynsha aıtylǵan pikirlerdi eskerip, 2018-2021 jyldarǵa arnalǵan Keshendi jospardyń jobasyn ári qaraı tolyqtyryp, belgilengen tártippen Úkimet otyrysyna shyǵarýdy tapsyrdy.
Petropavl qalasynda A. Mamın oblys ortalyǵyndaǵy halyqaralyq áýejaı men ushý alańyn jańǵyrtý jumystarymen, Oqýshylar saraıy jáne «Petropavl - Chelıabınskige shyǵý» M-51 avtokólik jolyn jańǵyrtý jumysy barysymen tanysty.
QR Premer-Mınıstriniń birinshi orynbasary «Qaztehmash» JShS kásipornynda nemis kontserni «CLAAS» negizinde jaqynda ashylýy josparlanyp otyrǵan aýyl sharýashylyǵy tehnıkalaryn qurastyrý zaýytynda boldy.
