Soltústik Qazaqstan oblysynda 130-ǵa jýyq aýyl sharýashylyq kooperatıvi quryldy

ASTANA. QazAqparat - Memlekettiń qoldaýymen Soltústik Qazaqstan oblysynda 127 aýyl sharýashylyq kooperatıvi quryldy. Bul týraly búgin Astanada Ortalyq kommýnıkatsııalar qyzmetinde ótken baspasóz máslıxatynda Soltústik Qazaqstan oblysy ákiminiń birinshi orynbasary Aıdarbek Saparov málim etti.

«Memleket basshysynyń tapsyrmasyn oryndaý maqsatynda «Kooperatsııa týraly» zań qabyldandy. Oblysta 127 aýyl sharýashylyǵy kooperatıvteri qurylǵan. Oǵan 8,6 myń adam jáne ózindik qosalqy aýyl sharýashylyqtary qosylyp otyr. Shamamen 30 myń bas iri-qara bar. Biz bul jumysty jalǵastyrýdamyz. Olar sút satyp alý pýnkterin, mal bordaqylaý alańdaryn ashýda. Oblysta bıylǵy jyldyń birinshi jartyjyldyǵynda 40-qa tarta sút qabyldaý pýnktteri ashyldy. Bul úlken qoldaý, biz olardy sýbsıdııalaýdy bastap kettik. Úshinshi toqsanda biz jarty mıllıard sýbsıdııany aýyl sharýashylyǵy kooperatıvterine aýdardyq», - deıdi ákim orynbasary.

Aıta ketken jón, óńirde mal sharýashylyǵy qarqynmen damýda. Bul sala aýyldyq jerlerde jyl boıy jumyspen qamtýǵa múmkindik beredi. Sondyqtan biz bul baǵytqa úlken mańyz berilip keledi. Et jáne et ónimderiniń eksporttyq áleýetin damytý baǵdarlamasy da óz jemisin berýde.

«2011 jyldan beri alys jáne jaqyn shet memleketterinen 11 myńnan astam asyltuqymdy iri-qara ákelindi. Olar angýs, gereford, sementaý jáne lımýzın tuqymdas sıyrlar. 40-qa tarta asyltuqymdy mal basyn kóbeıtetin reprodýktorlar quryldy. Qazirgi ýaqytta asyltuqymdy analyq bas sıyrlar jergilikti sharýashylyqtarǵa da taratylýda. Oblysta 14 iri sút kesheni jumys isteıdiá, - dedi A. Saparov.

Sonymen qatar óńirde aýyl sharýashylyq ónimderin óńdeıtin 154 kásiporyn bar. Oblysta aýyl sharýashylyq ónimderin óńdeýdiń arnaıy kartasy jasaldy. Onyń aıasynda jalpy somasy 191 mlrd teńgeniń 62 ınvestıtsııalyq jobasy júzege asyrylýda. Bular negizinen et pen sút óńdeý, un jáne makaron ónimderin jasaý, sonymen qatar maıly daqyldardy óńdeý jobalary. Kartaǵa 9 joba engizildi.