Soltústik Qazaqstan oblysyna 220 dáriger jetispeıdi
PETROPAVL. QazAqparat – Soltústik Qazaqstan oblysynda emdeý mekemelerin qajetti qondyrǵylarmen jaraqtandyrý úshin ekinshi jyl qatarynan 2,4 mlrd astam teńge bólindi, dep habarlaıdy QazAqparat tilshisi.
SQO ákimi baspasóz qyzmetiniń málimetinshe, bıyl koronavırýs ınfektsııasymen kúresý úshin ókpeni jasandy jeldetý apparattary satyp alynyp jatyr. Buǵan deıin olardyń sany 73 bolsa, qazir 112-ge jetti, jaqynda taǵy 111-i ákelinbek. Sondaı-aq óńirge 38 reanımobıl jetkizilýi tıis.
Oblystaǵy tórt emdeý mekemesinde 5 ottegi stansasynyń qurylysy bastaldy. Ottegi kontsentratorlarynyń sany 18-den 312-ge deıin, pýlsoksımetrler 450-den 1014-ke deıin jetti.
Densaýlyq saqtaý nysandarynyń materıaldyq-tehnıkalyq jaǵdaıyn jaqsartý maqsatynda oblysta 510 orynǵa shaqtalǵan kópsalaly oblystyq aýrýhananyń qurylysy bastaldy. Petropavldaǵy Bereke yqsham aýdanynda 250 adamdyq emhana jáne 200 oryndyq ınfektsııalyq aýrýhana salynyp jatyr.
Alaıda oblysta dáriger mamandary tapshy, óńirde 220 bos oryn bar. Dáriger jetispeýshiligi máselesin sheshý úshin birqatar is-sharalar qolǵa alynǵan.
«Óńirge medıtsına qyzmetkerlerin tartý úshin olardyń áleýmettik jaǵdaıyn jaqsarttyq. Jergilikti bıýdjet esebinen aýyldyq jerlerge baratyn dárigerlerge 1,5 mln teńge kótermeaqy beriledi. Asa qajet mamandardy – 76 dárigerdi rezıdentýrada oqytyp jatyrmyz. Oblysqa kelgen dárigerlerdiń barlyǵy 100% baspanamen qamtylady. Osyndaı jumystardyń nátıjesinde qajettilik 354 mamannan 220 mamanǵa deıin qysqardy», - dedi SQO ákimi Qumar Aqsaqalov.
Al 2023 jylǵa deıin medıtsına qyzmetkerleriniń eńbekaqysyn 2 ese kóbeıtý josparlanǵan. Qazir 246 myń teńge alsa, keıin olardyń tabystary 561 myń teńgege deıin jetpek.
