Soltústik Qazaqstan oblysyna 10 myńnan astam jumys kúshi kóshiriledi - mınıstr
NUR-SULTAN. QazAqparat – Búgin Úkimet otyrysynda QR Eńbek jáne halyqty áleýmettik qorǵaý mınıstri Serik Shápkenov Soltústik Qazaqstan oblysynda qansha jumys orny qurylatynyn aıtty, dep habarlaıdy QazAqparat tilshisi.
«Soltústik Qazaqstan oblysynyń 2021-2025 jyldarǵa arnalǵan áleýmettik-ekonomıkalyq damýynyń keshendi josparynda óńirge ınvestıtsııalar men bilikti mamandardy tartýǵa, jańa óndiris kózderi men jumys oryndaryn ashýǵa baǵyttalǵan naqty is-sharalar qarastyrylǵan. 2025 jylǵa deıin óńirde 97 myń, onyń ishinde memlekettik baǵdarlamalar men jeke kásipkerlerdiń bastamamalary boıynsha 71 myń jańa jumys ornyn qurý josparlanǵan. Sondaı-aq keshendi jospar aıasynda iske asyrylatyn jobalar boıynsha 16 myń turaqty jáne 10 myń ýaqytsha jumys orny qurylady. Barlyǵy 69 myń turaqty jumys orny ashylady», - dedi mınıstr.
Onyń sózine qaraǵanda, eńbek resýrstarynyń utqyrlyǵyn arttyrýdy yntalandyrýǵa, demografııalyq teńgerimsizdiktiń jáne keri kóshi-qon saldosynyń áserin azaıtýǵa baǵyttalǵan birqatar jumystar atqarylady.
«Birinshiden, bıznes protsesti ońtaılandyrý úshin bos jumys oryndary týraly málimetterdi alý, qonys aýdarýǵa ótinim berý jáne qabyldanǵan sheshimmen tanysý elektrondy eńbek bırjasy arqyly júzege asyrylatyn bolady. Ekinshiden, qonys aýdarýshylardy jumyspen qamtýǵa, jańa jerde beıimdeýge jaǵdaı jasaý úshin kóshýge beriletin bir rettik járdemaqy mólsherin kóbeıtý boıynsha jumystar júrgizilip jatyr», - dedi S. Shápkenov.
Onyń sózine qaraǵanda, jumys berýshilerdi yntalandyrý maqsatynda qonys aýdarýshylardyń eńbekaqysynyń bir bóligin sýbsıdııalaý, oqytý shyǵyndaryn óteý boıynsha sharalar qabyldanady.
«Jalpy, keshendi josparda qarastyrylǵan is-sharalar 2025 jylǵa óńirge 10 myńnan astam jumys kúshin kóshirýge, demografııalyq máselelerdiń jaqsarýyna oń áserin tıgizedi. Sonymen qatar, jumyssyzdyq deńgeıin 4,9 paıyzǵa deıin azaıtýǵa múmkindik beredi», - dedi mınıstr.
Aıta keteıik, búgin Úkimet otyrysynda QR Ulttyq ekonomıka mınıstri Áset Erǵalıev Soltústik Qazaqstan oblysynyń 2021-2025 jyldarǵa arnalǵan áleýmettik-ekonomıkalyq damýynyń keshendi josparyn tanystyrdy.
Premer-Mınıstr Asqar Mamın keshendi jospary óńirdiń ınfraqurylymyn jaqsartatynyn atap ótti.
