Soltústik Qazaqstan oblysy Beıjińde ınvestorlarmen jumys isteýge arnalǵan keńse ashady
PETROPAVL. QazAqparat - SQO ákimi Qumar Aqsaqalov jumys saparymen Qytaıdyń Hýbeı provıntsııasynda boldy, dep habarlaıdy «QazAqparat» HAA tilshisi oblys basshysynyń baspasóz qyzmetine silteme jasaı otyryp.
Qyzmettik sapar aǵymdaǵy jyldyń tamyz aıynda ótken aımaqtyq keńestiń otyrysynda jasalǵan kelisimder negizinde iske asty. Soltústikqazaqstandyq delegatsııa aımaqtyń ınvestıtsııalyq múmkindikterin kórsetip, ınvestorlarǵa jasalǵan jaǵdaılar men jumys sharttary jóninde aıtty.
Qumar Aqsaqalov birlesken jobalardy iske asyrý maqsatynda, Qytaı bıznesmenderin SQO-ǵa shaqyrdy.
«Bizdiń aımaq birneshe baǵyt boıynsha paıdaly ekonomıkalyq yntymaqtastyq sharttaryn usynýǵa daıyn. Onyń ishinde aýyl sharýashylyǵynan bastap, ónerkásip, mashına jasaý, agrosektordaǵy qaıta óńdeý, saýda-sattyq jáne basqa da salalar bar. Memleket tarapynan ınvestıtsııalyq jobalarǵa óndiristik ınfrastrýktýralar tartylǵan. Biz ár jobaǵa jeke-jeke nazar aýdaramyz», - dedi Qumar Aqsaqalov.
Ýhan qalasynda SQO ákimi azyq-túlik ónimderin ımporttaýdy kózdegen iri saýda núkteleri jáne jergilikti kompanııalardyń jetekshilerimen kelisózder júrgizdi.
Hýbeı provıntsııasynyń gýbernatory Van Sıaodýnmen kezdesý barysynda eki jaqty kelisim memorandýmyna qol qoıyldy.
Shııan qalasynda Qumar Aqsaqalov shahar meri Zang Veıgýmen kezdesip, eki-jaqty yntymaqtastyqtyń aldaǵy josparlaryn talqylady. Sonymen qatar, aımaq basshysy avtomobıl óndirisimen aınalysatyn «DongfengMotorCorporation» zaýytynda boldy.
«Hýbeı provıntsııasynda 61 mln. adam turady. Bul ólke el ekonomıkasynda besinshi, jalpy aımaqtyq ónim kórsetkishi boıynsha jetinshi oryn alady. Joǵary damyǵan óndiristik kesheni jáne ǵylymı-bilim berý negizderi myqty Hýbeı men, damyǵan aýyl sharýashylyǵy, mol resýrstary bar SQO arasyndaǵy yntymaqtastyq eki jaqtyń da ekonomıkasyn tolyqtyryp damyta alady», - dedi Qumar Aqsaqalov
SQO ákimi baspasóz qyzmetiniń aqparatyna súıensek, Beıjińdegi iri mekemelermen Shandýn, Henan, Tszıansý, Shensı sııaqty úlken provıntsııalardyń ókilderi oblys ekonomıkasyna ınvestıtsııa quıýǵa qazirdiń ózinde daıyn.
Jýyqta Beıjińde eki-jaqty yntymaqtastyqtyń suraqtary men máselelerin sheshýge arnalǵan SQO-nyń rnaıy ofısi ashylady.
