Soltústik Qazaqstan oblysy ańshylyq týrızmdi damytpaq
PETROPAVL. QazAqparat - Soltústik Qazaqstan oblysy ańshylyq týrızmdi damytpaq, dep habarlaıdy QazAqparat tilshisi.
Oblystyq tabıǵı resýrstar jáne tabıǵatty paıdalanýdy retteý basqarmasy ókilderiniń aıtýynsha, óńirdiń týrıstik áleýeti joǵary, sonyń ishinde ishinde ańshylyq týrızmdi damytý tetikteri jetkilikti.
«Ańshylyq týrızm - týrızmniń eń tanymal túrleriniń biri. Kóp shyǵyndy qajet etetinine qaramastan, búkil álemde týrızmniń osy túri qarqyndy damyp keledi», - deıdi basqarma ókilderi.
Bul rettegi alǵashqy qadamdar qoıylǵan. Aıyrtaý aýdanyndaǵy «Krasnyı kordon» ań sharýashylyǵyna Avstrııadan ańshy keldi. Munda kúlmiz (Sibir eliginiń atalyǵy) aýlanady.
«Paıdalanýshy ruqsattama qujattarynyń barlyǵyn aldyn ala resimdedi: sheteldiktiń qatysýymen ań aýlaý sharty jasalyp, qarý-jaraq ákelýge, janýarlar álemin paıdalanýǵa ruqsat alyndy», - deıdi basqarma ókilderi.
Salyq zańnamasyna sáıkes, janýarlar álemin paıdalaný úshin sheteldikterge salynatyn salyq bazalyq mólsherlemeden on ese artyq.
Ań sharýashylyǵynyń ıeleri bıyl Eýropadan keletin bes ańshy úshin týr uıymdastyrýdy josparlap otyr.
Oblysta týrızmniń osy túrin damytýǵa óńir basshysy Qumar Aqsaqalov basa nazar aýdaryp otyr. Ol Aıyrtaý aýdanyna jıi baryp, týrızm ınfraqurylymynyń damýyn baqylaıdy. Aýdan aýmaǵynda kópke belgili Shalqar jáne Imantaý kólderi ornalasqan. Munda tek Qazaqstannyń basqa óńirlerinen ǵana emes, kórshi Reseıden de týrıster keledi. Oblys basshylyǵy aldaǵy ýaqytta Shalqar-Imantaý kýrorttyq aımaǵyn qurýdy josparlap otyr.
