Soltústik Qazaqstan men Shyǵys Qazaqstan oblystaryna qonys aýdarý protsesi baıaýlady - depýtat

NUR-SULTAN. QazAqparat - Májilis depýtaty, «Nur Otan» partııasy fraktsııasynyń múshesi Meırambek Tólepbergen Premer-Mınıstrdiń orynbasary Eraly Toǵjanovqa el ishindegi óńiraralyq qonys aýdarý týraly depýtattyq saýalyn joldady, dep habarlaıdy QazAqparat tilshisi.

«24 mamyr kúni «Kazahstanskaıa pravda» gazetinde «Zalojnıkı ravnodýshııa» atty maqala jaryq kórdi. Sol kólemdi maqalada óńiraralyq qonys aýdarýdyń jaı-japsary bir oblystyń mysalymen taldap aıtyldy. Mine, osy maqalada kórsetilgen ótkir jáne óte qajetti máselege oraı Memleket Basshysy Qasym-Jomart Toqaevtyń tikeleı ózi nazarǵa alyp, Prezıdent Ákimshiligine Soltústik Qazaqstan oblysy, Aıyrtaý aýdanyna qonys aýdarǵan azamattarǵa arnalyp salynǵan turǵyn úılerdiń sapasyn tekserý týraly tapsyrma berdi.

Bul qozǵalyp otyrǵan máseleniń memlekettik máni zor ekenin taǵy da kórsetti. Memleket Basshysy Qasym-Jomart Toqaev óziniń «Táýelsizdik bárinen qymbat» atty baǵdarlamalyq maqalasynda elimizdiń qaýipsizdigine tikeleı qatysty ishki jáne syrtqy kóshi-qon máselesiniń elimizde erekshe mańyzy men ózektiligi bar ekenin atap ótti. Osy baǵytta el táýelsizdigi jyldarynda qyrýar is atqaryldy. Deı turǵanmen, Soltústik Qazaqstan jáne Shyǵys Qazaqstan oblystarynda demografııalyq jaǵdaı áli de turaqtandyrylmaı otyr», - dedi depýtat.

Onyń aıtýynsha, demografııalyq jaǵdaıynyń qıyndyǵyna oraı respýblıkalyq bıýdjet qarjysy esebinen qonys aýdarýshylardy turǵyn úımen qamtamasyz etý boıynsha pılottyq joba júzege asyrylyp jatqan Soltústik Qazaqstan oblysynyń Aqqaıyń, Aıyrtaý jáne Qyzyljar aýdandarynda ótken jyly qonys aýdarýshylarǵa arnalǵan baspanalar sapasyz salynǵandyǵy buqaralyq aqparat quraldary men áleýmettik jelilerde ótkir synaldy.

Joǵaryda baıandalǵannyń negizinde «Nur Otan» partııasy Fraktsııasynyń músheleri retinde kelesi usynystar engizildi:

1. Qazirgi ýaqytta ishki jáne syrtqy kóshi-qonnyń strategııalyq mańyzy artyp otyrǵandyǵyn jáne «Nur Otan» partııasynyń saılaýaldy baǵdarlamasyn iske asyrý jónindegi Jol kartasyna sáıkes, 2025 jylǵa deıin 80 myń qandastyń, onyń ishinde 2021 jyly 12 myń qandastyń qaıta oralýyna járdemdesý josparlanǵandyǵyn eskerip, bir kezde Úkimet janynda bolǵan Kóshi-qon jáne demografııa agenttigin qaıtadan qurý máselesin qarastyrǵan jón.

Sebebi, Eńbek jáne halyqty áleýmettik qorǵaý mınıstrliginiń Eńbek, áleýmettik qorǵaý jáne kóshi-qon komıteti kóshi-qon máselelerimen jetkilikti aınalysady deý qıyn. Atalǵan agenttikti qurý shetelderde jumys istep júrgen qazaqstandyqtardyń quqyqtaryn qorǵaý turǵysynan da qajet.

2. Sońǵy jyldary otandastardyń Soltústik Qazaqstan jáne Shyǵys Qazaqstan oblystaryna qonys aýdarý protsesi baıaýlap qalǵan, sol sebepten jergilikti atqarýshy organdar osy jumysty jandandyrýy tıis. Óıtkeni bul máseleler memleket pen halyqtyń múddeleri turǵysynan strategııalyq mańyzǵa ıe.

3. Qandastar men qonys aýdarýshylardy óńirlerde qabyldaý, jumysqa ornalastyrý jáne turǵyn úımen qamtamasyz etý máselelerine júıeli monıtorıng júrgizip, turaqty baqylaýda ustaý, sondaı-aq kóshi-qon salasyndaǵy memlekettik saıasatty iske asyrýǵa tıisti basshylardyń jaýapkershiligin qataıta túsken jón.

4. Qarjy monıtorıngi agenttigi qonys aýdarýshylarǵa memlekettik qoldaý kórsetýge jáne olardy jumysqa qabyldaǵan sharýashylyqtarǵa tólengen sýbsıdııalarǵa jumsalǵan bıýdjet qarjysynyń maqsatqa saı jumsalýyna qajetti tekseris júrgizýi kerek.