Soltústik Qazaqstan ákimi 16-shy jazǵy Azııa oıyndarynanjúldeli oralǵan sportshylarǵa nagradalar jáne páter kiltterin tabys etti
PETROPAVL. 4 jeltoqsan. QazAqparat /Sergeı Kýznetsov/ - Soltústik Qazaqstan ákimi Serik Bilálov Gýanjoýdaǵy 16-shy jazǵy Azııa oıyndarynan júldeli oralǵan soltústikqazaqstandyq sportshylarmen jáne olardyń jattyqtyrýshylarymen kezdesti,
dep habarlady ákimniń baspasóz qyzmetinen.
Ákim óz sózinde, Soltústik Qazaqstan oblysy sportshylarynyń respýblıkalyq jarystarda - oblystyń, halyqaralyq jarystarda Qazaqstannyń namysyn laıyqty qorǵap kele jatqanyn aıtty.
«Elbasy óz Joldaýynda qazaqstandyqtardyń 30 paıyzyn buqaralyq sportqa tartýdy tapsyrǵan bolatyn. Oblysymyzda bul mindet abyroımen atqarylyp keledi. Sonyń bir aıǵaǵy - sportshylarymyzdyń jetistikteri. Jasóspirimder arasyndaǵy olımpıada oıyndary, 16-shy jazǵy Azııa oıyndary men voleıboldan Qazaqstan kýbogynyń aqtyq jarysynda oblys sportshylary sheberlik pen jeńiske degen jigerin tanytty», - dedi ákim óz sózinde.
Sondaı-aq jıyn barysynda marapattaý rásimi ótti. Jazǵy Azııa oıyndarynyń jeńimpazy Margarıta Matsko men kúmis júldeger Evgenıı Ektov oblys ákiminiń qolynan páter kiltine ıe boldy. Sondaı-aq Aqan Baımaǵanbetovtyń bapkeri Qonysbek Túkenov te baspanaly boldy. Al Aqan Baımaǵanbetov, Natalıa Stefanskaıa, Artýr Sabıtov, Krıstına Grıgorıan, Roman Meleshın men «Esil» voleıbol klýby oblys ákiminiń syıaqysyn ıelendi. Soltústikqazaqstandyq bapkerlerge alǵystar hattar tabys etildi.
Kezdesýdi qorytyndylaǵan aımaq basshysy 2011 jyly Qazaqstanda 7-shi qysqy Azııa oıyndarynyń ótetindigin eske salyp, oblys sportshylaryna úlken úmit artylyp otyrǵanyn aıtty. Qysqy Azıada qarsańynda ótetin alaý estafetasyn kelesi jyldyń 21 qańtarynda Petropavl qalasy qabyldaıdy.
Oblys ákimi atalmysh sporttyq sharalar joǵary deńgeıde ótip, sportshylardyń bıik tuǵyrlardan kórinetindigine senimin bildirdi.
