Soltústik Karolına ýnıversıtetiniń professory: Jánibek pen Kereıdiń birigýi Qazaqstan tarıhynyń mańyzdy dáýiri boldy

ASTANA. QazAqparat - Jánibek pen Kereıdiń birigýi qazaqtardyń táýelsizdikke umtylysyndaǵy alǵashqy qadamyn pash etetin Qazaqstan tarıhynyń mańyzdy dáýiri boldy. Bul pikirdi QazAqparattyń Brıýsseldegi tilshisine telefon arqyly suhbat bildirgen Soltústik Karolına ýnıversıtetiniń professory Stıven Sebol bildirdi.

«Menińshe, dál sol kezeńde qazaqtar jeke halyq retinde tanyla bastaǵan bolatyn. Buqarlyqtardyń, hıýalyqtardyń jáne basqalardyń olardan aıyrmashylyǵy bar ekendigin túsinetin ýaqyt jetti. Tolyqtaı alǵanda, Jánibek pen Kereıdiń birigýi qazaqtardyń táýelsizdik jolyndaǵy alǵashqy qadamyn dáleldeıtin mańyzdy dáýir bolǵany anyq», - deıdi professor.

Osy rette ol Qazaq handyǵynyń qurylýyn keńinen atap ótý qazaq halqynyń ulttyq salt-dástúrine, mádenıeti men tarıhyna saı keletindigin ári onyń naqty jalǵasy bolyp tabylatyndyǵyn pash etetindigin basa aıtty.

«Qazaqtar Keńes odaǵyna deıingi birneshe ǵasyr buryn etnıkalyq birtutas ekendigin sezine bilgen bolatyn. Tipti, birneshe ǵasyr buryn olar óz terrıtorııasy, áleýmettik qurylymy men quqyǵy bar halyq retinde damyǵandyǵyn aıtýǵa bolady», - dedi Stıven Sebol.

Onyń atap ótýinshe, tarıh qıyn ári san qyrly ǵylym bolǵandyqtan ony adamdar da sal alýan qabyldaıdy. Degenmen, tarıhty zerdeleı túsý tarıhı oqıǵalardyń shynaıy sebepterin anyqtaýǵa múmkindik beredi.

«Qazaqtar tańǵajaıyp baı jáne óte aýyr tarıhqa ıe ekendigi belgili. Biraq, ókinishke oraı kóptegen stýdentter úshin ol «adamdy zeriktiretin» bolyp kórinedi. Olar ótkenniń búgingi qundylyqtaryn baǵalaı almaıdy. Sizderdiń tarıhtaryńyzda Semeı ıadrolyq synaǵy jáne ujymdastyrý syndy aýyr kezeńderdiń ótkeni belgili. Tarıhty zerdeleý munyń ne úshin oryn alǵanyn túsinýge septigin tıgizedi», - dedi sheteldik professor.