Soltústik Irlandııada sot ǵımaraty aldynda avtomobıldi jaryp jiberdi
ASTANA. QazAqparat - Keshe keshkisin Soltústik Irlandııada Londonderrı ortalyǵyndaǵy sot ǵımaratynyń aldynda turǵan avtomobıl jaryldy. Bul týraly Sky News telearnasy habarlaıdy.
Órtke oranǵan avtomobıldiń fotosýretin jarııalaǵan polıtsııa kólikke bomba qoıylǵan bolýy múmkin dep kúdiktenip otyr.
Soltústik Irlandııa jergilikti polıtsııa basqarmasy Facebook-te jarylystan eshkim zardap shekpegenin málimdedi.
«Bizdiń bilýimizshe, zardap shekkender joq», - delingen habarlamada.
Polıtsııa jýyq mańdaǵy úılerdiń turǵyndaryn ýaqytsha qaýipsiz jerge shyǵýǵa shaqyryp jatyr, óıtkeni taǵy bir avtomobıl kúdikke «ilikken». Alaıda, tekseris kezinde avtomobıldiń «taza» ekeni anyqtaldy.
Oqıǵanyń sebepteri ázirge belgisiz. Sonymen qatar eldiń ishki ister mınıstri Saımon Koývenı Twitter paraqshasynda bolǵan oqıǵany «terakt» dep atady.
