Soltústik ınvestıtsııalyq banki Qazaqstanda jumys isteýge nıetti

NUR-SULTAN. QazAqparat – Parlament Senatynyń Qarjy jáne bıýjet komıtetiniń keńeıtilgen otyrysynda «Qazaqstan Respýblıkasy men Soltústik ınvestıtsııalyq bank arasyndaǵy Soltústik ınvestıtsııalyq banktiń Qazaqstandaǵy qyzmetin retteıtin negizdemelik kelisimdi ratıfıkatsııalaý týraly» zań jobasy qaraldy, dep habarlaıdy QazAqparat tilshisi.

Atalǵan qujatqa 2018 jylǵy 16 qazanda Helsınkı qalasynda qol qoıylǵan bolatyn. Kelisim Qazaqstan Respýblıkasyndaǵy ınvestıtsııalyq jobalardy qarjylandyrý úshin Soltústik ınvestıtsııalyq banktiń qyzmetin ashýǵa múmkindik beredi.

QR Ulttyq ekonomıka birinshi vıtse-mınıstri Áset Irǵalıevtiń aıtýynsha, Soltústik ınvestıtsııalyq bank qarjylandyrýynyń negizgi baǵyttary retinde energetıka, telekommýnıkatsııa, kólik, ónerkásiptiń túrli salalary, aýyl sharýashylyǵy, densaýlyq saqtaý sııaqty sektorlar qamtylǵan. Qazaqstan men Soltústik ınvestıtsııalyq bank arasyndaǵy atalǵan kelisim elimizdegi kásipkerlikti jáne jeke sektordy damytýǵa, ekonomıkanyń sapaly ósimin arttyrýǵa múmkindik beredi. Kelisim múshelik jarnalar jáne bıýdjetten basqa da tólemderdi talap etpeıdi.

Osy oraıda ol kelisimdi ratıfıkatsııalaý áleýmettik-ekonomıkalyq jáne quqyqtyq saldarlarǵa ákep soqtyrmaıtynyn atap ótti.

Talqylaýdan keıin komıtet músheleri qujatty Parlament Senaty jalpy otyrysynyń talqylaýyna joldady.

Aıta keteıik, Soltústik ınvestıtsııalyq bank 1975 jyly quryldy jáne Skandınavııa men Baltyq elderi múshe bolyp tabylatyn kópjaqty damý banki. Shtab-páteri Helsınkı qalasynda ornalasqan. Soltústik ınvestıtsııalyq banktiń jarǵylyq kapıtaly 6 mlrd 142 mln eýrony quraıdy, ol múshe elderdiń tólemderinen qalyptasady (Danııa, Estonııa, Fınlıandııa, Islandııa, Latvııa, Lıtva, Norvegııa, Shvetsııa).

Soltústik ınvestıtsııalyq banktiń jalpy kredıttik portfeli 2018 jyly 19,1 mlrd eýrony qurady. Qaryzdar 25 jylǵa deıingi merzimge beriledi. Banktiń strategııasyna sáıkes kredıttik portfeldiń shamamen 20% onyń músheleri bolyp tabylmaıtyn elderge beriledi.