Soltústik aımaqqa kóshetinderge 50%-dyq turǵyn úı sertıfıkaty beriledi
Bul týraly QR Eńbek jáne halyqty áleýmettik qorǵaý mınıstri Tamara Dúısenova «Qazaqstan» ulttyq telearnasyna bergen suhbat barysynda málimdedi, dep habarlaıdy QazAqparat tilshisi.
«Óńirlerdi damytýǵa arnalǵan ulttyq joba aıasynda elimizdiń Soltústik óńirlerinde turýǵa nıetti turǵyndardy kóshirý jumysy jalǵasyp jatyr. Jalpy turǵyndardy Soltústik aımaqtarǵa kóshirý máselesi ondaǵy jumys kúshiniń tapshylyǵymen de baılanysty. Bizdiń endigi maqsat – azamattardy kóshirip qana qoımaı, olarǵa jumys taýyp berý. Men jýyrda SQO-da bolyp, oblys ákimi jáne bıznes ókilderiniń qatysýymen semınar ótkizdik. Sonda bıznes ókilderi bizge jumys oryndaryn ashýǵa múmkindik jasańyzdar degen ótinish bildirdi. Osy oraıda SQO ákimshiligi arnaıy baǵdarlamany iske qospaq bolyp otyr. Sol arqyly bıznes ókilderi men kásipkerlerdiń jańa jumys oryndaryn ashýǵa múmkindik berilmek», - dedi Tamara Dúısenova tikeleı efır barysynda.
Mınıstr keltirgen málimetke sáıkes, atalǵan aımaqta bıznesti damytýǵa respýblıkalyq jáne jergilikti bıýdjetten 20 mlrd teńge qarastyrylyp otyr.
«Sonymen qatar azamattardy baspanamen qamtý da mańyzdy. Kelesi jylǵa biz jańa joba qarastyryp jatyrmyz. Turǵyn úı baǵasynyń 50 paıyzyn qarjylaı sertıfıkat retinde berý. Ol qarjyǵa turǵyn úıdi salyp alady ma nemese «Otbasy bankine» aparyp alǵashqy jarna retinde qoldana ma ony ár adam ózi biledi. Soltústik óńirlerde osyǵan deıin paıdalanýǵa berilgen turǵyn úılerdiń sapasyna qatysty syn bar. Sondyqtan da 50 paıyzdyq sertıfıkatty ár azamattyń ózine berý qarastyrylyp otyr», - deıdi ol.
Vedomstvo basshysynyń aıtýynsha, turǵyn úı alýǵa beriletin qarjynyń maqsatty jumsalýyn baqylaý úshin azamatpen kelisimshart jasalatynyn aıtty.
Eger azamat baspana alýǵa berilgen aqshany maqsatsyz jumsasa, onda qarjyny túgeldeı memleketke qaıtarýǵa mindetti.
Sondaı-aq, efır barysynda eńbek mınıstri Tamara Dúısenova áıelderdiń 58 jastan zeınetke shyǵýyna qatysty pikir bildirdi.
