Soltanbaı Jaryqbasov: Soǵysqa Tashkenttegi mergender kýrsynda oqyp, attandym

QONAEV. QazAqparat - Uly Otan soǵysynyń ardageri, Almaty oblysyndaǵy Eńbekshiqazaq aýdanynyń turǵyny Soltanbaı Jaryqbasov soǵysqa attanǵan sátin eske aldy, dep habarlaıdy QazAqparat tilshisi.

Soltanbaı Jaryqbasov maıdanǵa attanbas buryn Tashkenttegi mergender kýrsynda oqyǵanyn jetkizdi.

«18 jastaǵy bozbala boldyq. Arnaıy mergender kýrsynda oqyp, halqymdy jaýdan qorǵadyq. Zulmat zaman kóz aldymda. Soǵysty urpaǵym kórmesin. Zamanymyz tynysh, aspanymyz ashyq bolsyn», - dedi Soltanbaı Jaryqbasov.

Japondyqtarǵa qarsy soǵysqan Soltanbaı Jaryqbasov Zabaıkal maıdanyndaǵy 25-shi qyzyl týly mehanıkalandyrylǵan brıgadanyń quramynda 1-shi batalonnyń, 1-shi rotasynyń pýlemet bólimshesiniń komandıri bolǵan.

Aıta keteıik, Soltanbaı Jaryqbasov 1925 jyly ómirge kelgen. Ol 1943 jyldyń qańtarynda Tashkenttegi mergender kýrsynda oqyp, sáýir aıynda áskerge attanǵan.

UOS ardageri - 1 dárejeli «Otan soǵysy» ordeniniń ıesi. Sonymen qatar, 1941-1945 jyldardaǵy Uly Otan soǵysyndaǵy Jeńistiń mereıtoılyq, merekelik medaldarymen marapattalǵan.