Sol Kempbell: «Qaırat» Eýropa alyptaryna qarsy senimdi oıyn kórsetti

ASTANA. KAZINFORM — «Qaırattyń» alǵashqy Chempıondar lıgasyndaǵy matchy Qazaqstan fýtboly úshin tarıhı oqıǵaǵa aınaldy. Bul týraly «Arsenaldyń» burynǵy oıynshysy Sol Kempbell Kazinform tilshisiniń suraǵyna bergen jaýabynda málimdedi.

— Meniń oıymsha, komanda óte jaqsy óner kórsetti, ásirese birinshi taımda. Dopty senimdi ustady, tipti alǵashqy on sekýndta-aq aıqyn múmkindikke ıe boldy. Ókinishke qaraı, sol sátte Kýrtýaǵa kóbirek qysym jasaı almady. Degenmen, «Qaırattyń» qaqpashysy tamasha oıynymen kózge tústi. Ol nebári 18 jasta, alaıda bolashaǵy jarqyn, — dedi Sol Kempbell.

Onyń aıtýynsha, «Qaırat» Eýropanyń eń myqty klýbtarynyń biri — eń kóp Chempıondar lıgasyn jeńip alǵan «Real Madrıdke» qarsy oınady.

— Bul tarıhı kún, tamasha atmosfera boldy. Bul tek «Qaırat» úshin ǵana emes, búkil Qazaqstan úshin mańyzdy oqıǵa, — dep túıindedi ol.

Buǵan deıin halyqaralyq BAQ ÝEFA Chempıondar lıgasynyń toptyq kezeńinde «Qaırat» pen «Real Madrıd» kezdesýin keńinen talqylaǵan edi.