Soqqyǵa jyǵylǵan dárigerge kómek retinde Qazaq onkologııa jáne radıologııa ǴZI qyzmetkerleri 1 mln. 600 myń teńge aýdardy
ALMATY. QazAqparat- Almatyda shaqyrtý boıynsha naýqasqa baryp, aýyr soqqyǵa jyǵylǵan jedel-járdem dárigeri Narkesken Seısenbaevqa kómek retinde Qazaq onkologııa jáne radıologııa ǴZI qyzmetkerleri bir kúndik jalaqylaryn aýdardy.
Bul týraly búgin atalmysh ınstıtýttyń baspasóz qyzmetinen habarlady.
«Osydan birneshe kún buryn áleýmettik jelide Narkesken Seısenbaevtyń dosy Qýanysh Ormanov qazaqstandyqtardan kómek surap, qarjylaı qoldaý kórsetýlerin ótingen bolatyn. Narkesken qazir ózi jumys isteıtin №7-shi qalalyq aýrýhananyń jansaqtaý bóliminde es-tússiz jatyr. Esin jıǵan kúnniń ózinde oǵan múgedek bolyp qalý qaýpi tónip tur. Bul oqıǵaǵa beı-jaı qaramaǵan Qazaq onkologııa jáne radıologııa ǵylymı-zertteý ınstıtýtynyń qyzmetkerleri bir kúndik jalaqylaryn, ıaǵnı Narkeskenniń em kezindegi kútimi úshin arnaıy shotqa 1 mln. 600 myń teńge aýdardy», - delingen habarlamada.
«Biz Narkeskenniń dostary, oǵan ońalý kezinde kómek bolsyn dep qazaqstandyqtardan kómek suradyq. Onyń jaǵdaıy óte aýyr. Onkologııa ınstıtýtynyń dárigerleri janaıqaıymyzǵa jaýap berdi. Narkesken jedel-járdem qyzmetinde qosymsha jumys istep júrgen bolatyn. Ózi óte eńbekqor jigit», - dedi osyǵan oraı Qýanysh Ormanov.
Esterińizge sala ketelik, 26 qarashada shaqyrtýmen barǵan jedel-járdem dárigerlerinen naýqas áıelin qyzǵanǵan er adam olarǵa qarsylyq kórsetken bolatyn. Ony toqtatpaq bolǵan Narkesken Seısenbaevty taspen urǵan. Basynan aýyr soqqy alǵan Narkeskenniń mıyna qan quıylyp, komaǵa tústi. Al kúdikti kóp uzamaı ustaldy.
Aıta ketelik, kúdikti qazir Almaty q. ІІD ýaqytsha ustaý abaqtysynda otyr. Onyń kepil arqyly bosatý týraly ótinishi qanaǵattandyrylmady.
Sotqa deıingi tergeý amaldary júrgizilip jatyr.
