«Soqyr aımaq» júk kólikterimen bolatyn apattyń basty sebebi me
ASTANA. KAZINFORM — Elimizde keıingi jyldary iri júk kólikteriniń qatysýymen bolatyn jol-kólik oqıǵalary jıilep keledi. Munyń sebebin Astana qalasy Polıtsııa departamenti Ákimshilik polıtsııa basqarmasynyń bólim bastyǵy, polıtsııa podpolkovnıgi Baýyrjan Toqjumanov Jibek Joly telearnasynyń «Búgin Live» baǵdarlamasynda túsindirdi.
— Jyl basynan beri Astanada 900 jol-kólik oqıǵasy tirkeldi. 900 adam jaraqat aldy. 11 adam qaza tapty. Júk kólikteriniń qatysýymen 15 jol apaty bolyp, saldarynan 16 adam jaraqat alyp, 1 adam kóz jumdy. Ótken jylmen salystyrǵanda kórsetkishter joǵary. Byltyr 800-den astam jol-kólik oqıǵasy tirkelgen edi, — dedi spıker.
Mamannyń pikirinshe, mundaı oqıǵalardyń negizgi sebepteriniń biri — júrgizýshige kórinbeıtin «soqyr aımaqtar».
— Ol kóliktiń oń jáne sol jaq búıirlerinde, sondaı-aq aldyńǵy jáne artqy bóliginde bolady. Ásirese oń jaq tus qaıǵyly jaǵdaılarǵa jıi sebep bolady. Balalar men velosıpedshiler júrgizýshi ózin kórip tur dep oılaıdy. Alaıda aýyr tehnıkanyń kabınasynan tómendegi nemese qaptaldaǵy qozǵalysty baıqaý árdaıym múmkin emes, — dedi ol.
Máseleniń qanshalyqty mańyzdy ekenin jýyrda bolǵan qaıǵyly oqıǵa baıqatty.
— Jaqynda Astanada júk kóliginiń júrgizýshisi ońǵa burylý kezinde velosıpedshini qaǵyp, saldarynan jasóspirim kóz jumdy. Atalǵan derek boıynsha qylmystyq is qozǵaldy, qazir tergeý júrip jatyr. Sot-medıtsınalyq saraptama taǵaıyndaldy, — dedi Baýyrjan Toqjumanov.
Osyndaı jaǵdaılardyń aldyn alý úshin polıtsııa profılaktıkalyq jumystardy turaqty júrgizip keledi. Ásirese balalardyń joldaǵy qaýipsizdigine erekshe kóńil bólinýde. Spıkerdiń aıtýynsha, bul baǵytta «Qaýipsiz jol» jáne «Mektep» sııaqty aldyn alý sharalary uıymdastyrylyp jatyr.
Sonymen qatar maman velosıped pen samokat qoldanýshylaryn jolda barynsha saq bolýǵa shaqyrdy.
— Jol qozǵalysy erejelerin saqtaý kerek. Kaska kıip, qarańǵy ýaqytta jaryq shaǵylystyratyn elementterdi qoldanǵan jón. Júk kólikteriniń janynda qaýipsiz araqashyqtyqty saqtaý mańyzdy. Sondaı-aq mundaı kólikterge jol berip, olardyń tolyq ótip ketkenine kóz jetkizgennen keıin ǵana qozǵalǵan durys, — dedi spıker.
Buǵan deıin mańǵystaýlyq túlekterdiń jol talǵamaıtyn kóliktermen kortejge shyqqanyn jazǵan edik.
