Soǵystan keıin de B. Momyshuly óziniń azamattyq ustanymy, jazýshylyq qasıetimen joǵary dárejede qaldy - M.Qoıgeldi
Y. Qańtardyń 19-y. QazAqparat /Ádilet Musahaev/ - Búgin Almatydaǵy kitap murajaıynda Baýyrjan Momyshulynyń týǵanyna 100 jyl tolýyna baılanysty «Halyq batyry» atty kórmeniń ashylý saltanaty ótti,
dep habarlaıdy QazAqparat.
Dańqty qolbasshy, Keńes Odaǵynyń Batyry, Halyq qaharmany, jazýshy B.Momyshulynyń adamgershilik tulǵasy, ustazdyq ǵıbrattary men erlikteri kóptegen dastandar men shyǵarmalar jelisinde aıshyqtala túsken bolatyn.
Kórmege kitap murajaıy qorynan alynǵan kitaptarynyń alǵashqy nusqalary men qoljazba, hattary, maıdanda jazylǵan dápterleri, sarǵaıǵan fotosýretteri qoıylǵan. Sondaı-aq «Ushqan uıa», «Moskva úshin shaıqas», «General Panfılov», «Kýba áserleri», «Qanmen jazylǵan kitap», «Psıhologııa voıny», «Soǵys qatelikti keshirmeıdi» jáne taǵy basqa batyrdyń óz shyǵarmalary jáne «Óner» baspasynan shyǵyp jatqan kóp tomdyqtary men «Qaharman Baýyrjan Momyshuly» atty fotoalbomy kórmeden oryn alǵan.
«HH ǵasyrdyń basy qazaq halqy úshin óte aýyr kezeń boldy. Óıtkeni 2 ret asharshylyqty, repressııany basynan keshirdi jáne qazaq halqynyń saǵy synatyndaı kóptegen oqıǵalar boldy. Mine, osyndaı oqıǵalardan keıin qazaq jigitteriniń ekinshi dúnıejúzilik soǵysta erlik kórsetýi bul erekshe qubylys. Qazaq jigitteri qan maıdanda áli de bolsa tulǵalyq sıpatynyń bıik ekenin, batyr ult ekendigin kórsetti. Osy Uly Otan soǵysyndaǵy qazaq halqynyń ustanymyn, ornyn kórsetetin batyrlar kóp boldy, degenimen ony B. Momyshulynsyz elestetý múmkin emes. Soǵystan keıin de B. Momyshuly óziniń azamattyq ustanymy, jazýshylyq qasıetimen joǵary dárejede qaldy», deıdi tarıh ǵylymdarynyń doktory Mámbet Qoıgeldi.
