Soǵystaǵy úlken erlik -halyqtyń birligi, otansúıgishtigi -Saparbaev
Aqtóbe oblysynyń ákimdigi janyna T.Bıgeldınov atyndaǵy áýe qorǵanys kúshteri áskerı ınstıtýty, M.Bókenbaev atyndaǵy zań ınstıtýtynyń kýrsanttary, ofıtserler jáne óńirdegi áskerı bólimder men quqyq qorǵaý organdary qyzmetkerleriniń qatysýymen áskerı sherý ótti. Sherýge soǵys ardagerleri men qarapaıym qala turǵyndary da qatysty.
«Dúnıedegi eń qasıetti, qadirli, este qalatyn kún -Jeńis kúni. Bul kúndi biz eshýaqytta esten shyǵarmaı, jeńis alyp bergen ardagerlerimizdi umytpaýymyz kerek. 4 jylǵa sozylǵan soǵys mıllıondaǵan Keńes jaýyngeriniń ómirin qıdy. Biz sol adamdardyń aldynda ár ýaqytta boryshtarmyz. Osy soǵysqa 120 myńǵa jýyq aqtóbelik qatysty. Ókinishke qaraı, olardyń jartysynan kóbi elge orala almady. Soǵysta bizdiń atalarymyz, apalarymyz ózderiniń erlikterin kórsetti. Soǵystaǵy úlken erlik -halyqtyń birligi, otansúıgishtigi. Tek maıdan dalasynda emes, tylda da kún, tún demeı ter tógip, eńbek etti. Olar qarý-jaraqpen, tamaqpen qamtamasyz etti»,- dedi oblys ákimi Berdibek Saparbaev.
Keıin aqtóbelikter atalary men analarynyń portretin ustap, Ábilqaıyr han dańǵyly boıymen júrip ótti.
«Atamyz Muhambetqazy Dospolovtyń sýretin alyp shyqtyq. Soǵys bastalǵan jyly maıdanǵa attanyp, joǵalyp ketti. Al naǵashy atamyz Eskendir Tólegenov soǵysqa baryp, 1946 jyly elge oraldy. Ol erligi úshin medalimen úsh ret marapattalyp, «Qyzyl juldyz» ordenin taqty. Taıaýda ınternetten onyń ergili týraly oqyp, tanystyq. Biz ata-babamyzǵa alǵys aıtyp, Jeńis kúninde eske alamyz. Qolymyzdan keletini osy ǵana. Beıbit zaman úshin alǵys aıtamyz»,- dedi qala turǵyny Venera Súleımenova.
Al aqtóbelik Sabına Nurǵalıeva 16 jasynda maıdanǵa attanyp, aman-esen kelgen atasynyń portretin alyp shyqty.
«Atam Sabyrjan Muhambetjanov ІІ Ýkraına maıdanynda tankıst boldy. Ol 16 jasynda maıdanǵa attanyp, Kenıgsberg, Býdapesht, Rýmynııa, Polshany azat etýge qatysty. Soǵystan soń Qaraǵandy oblysynda esepshi bolyp eńbek etti»,-dedi Sabına Nurǵalıeva.
Búgin keshkilik «Uly Otan soǵysy áýenderi» atty merekelik shara ótedi, ortalyq saıabaqta otshashý bolady.
Aıta keteıik, Aqtóbe oblysynda barlyǵy 61 soǵys ardageri bar. Onyń 53-i Aqtóbe qalasynda turady. Sonymen qatar, Alǵa, Mártók, Muǵaljar, Hromtaý aýdandarynda soǵys ardageri bar. Ardagerlerdiń eń úlkeni Petr Hodýs bıyl 100 jasqa tolady.
