Soǵysta Ýkraınada qaza tapqan qazaq sarbazynyń súıegi týǵan aýylyna jerlenedi

NUR-SULTAN. QazAqparat - «Atamnyn Amanaty» qoǵamdyq birlestigi Ekinshi dúnıejúzilik soǵysta qaza bolǵan, osy kúnge deıin iz-túzsiz ketken bolyp eseptelgen qazaqstandyq sarbaz Qaıyrjan Tikshekeevtiń súıegin Qazaqstanǵa ákeledi. Jaýyngerdiń súıegin 2020 jyldyń naýryz aıynda Ýkraınada «Vertıkal» mamandandyrylǵan izdeý birlestigi tapty, dep habarlaıdy QazAqparat.

Qoǵamdyq birlestiktiń málimetinshe, qazaqstandyq sarbazdyń súıegi aldaǵy 10 kúnde elge jetkiziledi. Qaıyrjan Tikshekeev 1916 jyly Soltústik Qazaqstan oblysynda dúnıege kelgen. Maıdanǵa 1940 jyly shaqyrylǵan. Qazirgi tańda jaýyngerdiń súıegi Ýkraınadaǵy (Kıev) Qazaqstan Respýblıkasynyń áskerı attashesine berildi. Qazaqstanǵa ákelingen soń nemeresi Marat Tikshekeevke resmı túrde tabystalady. Soldatty jerleý rásimi Soltústik Qazaqstan oblysy Aıyrtaý aýdany Dáýqara aýylynda ótedi. Sharany uıymdastyrýǵa Soltústik Qazaqstan oblysynyń ákimdigi kómektesedi.

«Osyǵan deıin tórt qazaqstandyq soldattyń súıegin elge ákeldik. Qaıyrjan Tikshekeev besinshisi. Bizdiń izdeýshiler jáne Ýkraınadaǵy izdeýshiler birlestigi úlken jumys atqardy. Olar qazaqstandyq sarbazdyń súıegin tapty. Al biz jaýyngerdiń týystaryn taptyq. Biz úshin Marat Tikshekeevtiń qýanyshyna sebepker bolý úlken mártebe. Sarbazdy onyń ákesi, anasy, ájesi izdegen. Araǵa 80 jyl salyp qazaqstandyq jaýyngerdi taptyq», - dedi «Atamnyn Amanaty» qoǵamdyq birlestigi basqarma tóraǵasynyń orynbasary Raıgúl Mushanova onlaın brıfıng barysynda.

«Atamdy izdeý 80 jylǵa sozyldy. Qaıyrjandy onyń anasy Jámılıa ómir boıy izdedi. Qaıyrjan onyń jalǵyz uly bolatyn. Sońǵy hatyn 1941 jyldyń shilde aıynda alǵan. Odan keıin balasymen baılanysy úzilip ketti. «Habar-osharsyz ketti» degen qaǵaz aldyq. Atamyzdy ájem izdedi, ákem izdedi. 2004 jyly ákem dúnıeden ótti. Atamyz maıdannan jazǵan 12 hatyn maǵan amanat etip qaldyryp ketti. Ary qaraı izdeýdi men jalǵastyratynymdy aıtty. 2009 jyly as berdik. Bıyl «Ýkraınada atańyz tabyldy» degen habardy estigen soń, qatty qýandyq», - deıdi jaýyngerdiń nemeresi Marat Tikshekeev.

10 naýryzda Kıev oblysynyń (Ýkraına) Makarovskıı aýdany Borovka aýylynda júrgizilgen izdeý jumysy barysynda tórt sarbazdyń súıegi tabylǵan. Sonyń bireýi Qaıyrjan Tikshekeev.

«Sarbazdyń jeke taný belgisi tabyldy. Sonyń arqasynda ekspertıza barysynda soldat týraly barlyq aqparatty bildik. Biz jaýyngerdi tapqan jer baýyrlastar zıraty emes, ol egistik alqaby, qazirgi tańda ol jerde júgeri egilgen. Qaıyrjan Tikshekeev súıegi shuńqyrdyń ishinde tabyldy. 1941 jyly Kıevti 28 atqyshtar dıvızııasy qorǵaǵan. Dál osy jerde qazaqstandyq soldat óziniń sońǵy shaıqasyn ótkizip, jaý oǵynan qaza tapqan», - deıdi «Vertıkal» mamandandyrylǵan izdeý birlestiginiń jetekshisi Vladımır Jarko.