Soǵysta soqyr bolyp qalǵan sheshen jigiti: Qazaqstan maǵan ekinshi ómir syılady
«Eki jasymda Sheshenstanda soǵys bastaldy. Soǵys - qaıǵy men kúızelis, aýyrtpalyq pen týǵanyń úshin qorqynysh. Bizdiń kópqabatty úıimiz buzylyp, ákemniń aǵasy qaıtys boldy. Al men soqyr bolyp qaldym. Myńdaǵan sheshen halqymen birge týǵan jerimizdi tastap ketýge májbúr boldyq. Qaı elge baramyz dep oılasqan kezde ata-anam birden Qazaqstandy tańdady. Sebebi, úlkenderdiń aıtýynsha, 75 jyl buryn keńpeıil qazaq halqy sonaý 1944 jyly sheshenderdi qutqaryp qalypty», - deıdi jas bıznesmen QHA-nyń 27-shi sessııasynda.
Onyń aıtýyna qaraǵanda, Qazaqstan sol tusta taǵy da bosqyndardy qushaq jaıa kútip alǵan.
«Meni qazaq otbasy tárbıeledi, densaýlyǵymdy qalpyna keltirip, ekinshi ómir syılady. Bizdiń eldegi berilgen basymdyqtyń arqasynda men mektep pen ýnıversıtetti úzdik bitirip, qazaq, aǵylshyn jáne qytaı tilin meńgerdim. 26 jasymda malaızııalyq «Emır-Oıl» kompanııasynyń ken oryndary boıynsha basqarma bastyǵy boldym. Burynǵy bosqyn, soqyr, soǵys balasy... Qazaqstanda eńbektiń arqasynda jetistikke jetý múmkin emes degendi maǵan endi bireý kelip shamasy jetse dáleldep kórsin», - deıdi ol.
Óz sózinde sheshen jigiti Elbasy Nursultan Nazarbaevqa sózin arnady.
«Sheshen halqynyń basynan eń aýyr kúnder ótip jatqan kezde Siz birinshi bolyp kómek qolyn sozdyńyz. Sizdiń tapsyrmańyzben, Groznyıda mektep pen kópqabatty úı salyndy. Alǵys retinde atalǵan mektep pen úı turǵan kóshege Sizdiń atyńyz berildi. Siz sheshen halqynyń tarıhynda máńgilik qaldyńyz. Sizdi bitimger dep ataıdy. Ótken jyldyń tamyz aıynda Kaspııdiń quqyqtyq mártebesine qatysty máselege núkte qoıdyńyz. Mańǵystaý jastary - Assambleıa uranymen Kaspıı mańyndaǵy elderdiń jastar sammıtin ótkizýdi usynamyz. Halyqtyq dıplomatııa aımaqtaǵy sizdiń beıbitshilik pen kelisimdi tý etken saıasatyńyzdy jalǵastyra bersin», - deıdi bıznesmen.
Eske sala ketsek, elordada QR Tuńǵysh Prezıdenti - Elbasy, QHA Tóraǵasy Nursultan Nazarbaevtyń tóraǵalyǵymen Qazaqstan halqy Assambleıasynyń XXVII sessııasy ótip jatyr.
