Soǵysta habarsyz ketken jaýyngerdiń qujaty tabyldy - Atyraý
ATYRAÝ. QazAqparat –Atyraý oblysynan Ekinshi dúnıejúzilik soǵysqa attanyp, habarsyz ketken jaýynger Temiráli Sársenbaevtyń qujattary týystaryna tabystaldy, dep habarlaıdy QazAqparat.
Oblys ákiminiń orynbasary Baqytgúl Hamenovanyń aıtýynsha, atyraýlyq jaýyngerdiń portreti men qujattary Reseı Federatsııasynyń Volgograd qalasyndaǵy mýzeıden tabylǵan.
«Maıdannan oralmaǵan azamattar týraly derekterdi jınaqtaýmen «Atamnyń amanaty» qoǵamdyq qory aınalysyp júr. Búginde atalǵan qor Reseı Federatsııasynyń «Poıskovoe dvıjenıe Rossıı» qoǵamdyq birlestigimen memorandýmǵa qol qoıǵan. Ekijaqty yntymaqtastyqtyń nátıjesinde tabylǵan jerlesimiz Temiráli Sársenǵalıevtiń portretiniń kóshirmesi men qujattaryn týystaryna tabystadyq», -dedi Baqytgúl Hamenova.
Temiráli Sársenǵalıev 1922 jyly burynǵy Gýrev oblysy, Teńiz aýdanynyń Jambyl kolhozy, Muratov aýyldyq keńesinde dúnıege kelgen. «Qyzyl Juldyz», Stalınıngradty mınadan tazartýdaǵy janqııarlyǵy úshin ІІ dárejeli «Otan soǵysy» ordenderimen marapattalǵan.
