Soǵys jyldary qazaqstandyqtar Keńes áskerine 1200 vagon syılyq jibergen
Sonymen qatar «Kolhoznık Kazahstana» tanktik kolonnasynyń qurylysyna 270 mln. som aqsha aýdardy. Osyndaı derektermen búgin Almatydaǵy QR Prezıdenti arhıvinde ashylǵan tarıhı-qujattamalyq kórmede tanysýǵa bolady, dep habarlaıdy QazAqparat tilshisi.
QR Prezıdenti arhıviniń dırektory Borıs Japarovtyń aıtýynsha, kórmege Ekinshi dúnıejúzilik soǵys jyldaryndaǵy arhıvti qujattardyń túpnusqalary qoıylǵan.
«Qazaqstanda sol kezde halyqty jumyldyrý jumystary joǵary deńgeıde júrgizilgen. Ǵalymdardyń aıtýynsha, sol kezdegi odaqtas memleketter arasynda «mobılızatsııa» eń joǵary deńgeıde júrgizilgen el Qazaq SSR-i bolǵan. Halyqtyń 22 paıyzy ásker qataryna alynǵan», - deıdi Borıs Japarov.
Kórmege sondaı-aq Qazaqstan Kommýnıstik partııasy Ortalyq komıtetiniń qazaqstandyqtardy ásker qataryna shaqyrý týraly sheshimderi, Qazaqstanda jasaqtalǵan áskerılerdiń azyq-túlikpen, qarý-jaraqpen jáne materıaldyq qamtamasyz etilýine qatysty qujattar qoıylǵan.
Kórme qujattarynda respýblıkalyq áskerı komıssarıattardan maıdanǵa 14 atqyshtar jáne kavalerııa dıvızııalary, 7 brıgada, 1 zenıt polki, 12 qurylys jáne 2 avtobatalon jiberilgeni, olardyń ishinde 5 áskerı quram gvardııalyq bolyp qurylǵany aıtylǵan.
Kórme ekspozıtsııalaryna súıensek, soǵys jyldary maıdanǵa respýblıkadan 13 130 júk jáne 825 jeńil avtokólik, 1 538 traktor, 110 118 jylqy jáne 10 260 júk arbalary jóneltilgen. Soǵys jyldarynda qazaqstandyqtar jaýyngerlerge 1 205 vagon syılyqtar, kıim-keshek jáne azyq-túlikterdi jiberip, «Kolhoznık Kazahstana» tanktik kolonnasynyń qurylysyna 270 mln. som aqsha aýdarǵan.
«Soǵys Qazaqstan basshylyǵyn halyqty maıdanǵa jumyldyrý, áskerı quramalardy qalyptastyrý, azamattyq turǵyndardy áskerı mamandyqtarǵa oqytý, maıdanǵa qarý-jaraq, oq-dáriler, áskerı jabdyqtardy, kólik pen azyq-túlik jiberý sekildi máselelerde jedel sheshim qabyldaýǵa májbúr etti. Qazaqstan jerinde bolǵan daıyndyq isteri, tyl jumystaryn uıymdastyrý, eldiń ekonomıkasyna qatysty, Keńes Odaǵynyń batysynan ákelingen zaýyttardy qysqa ýaqytta iske qosyp, maıdanǵa qajetti jabdyqtardy jiberý sııaqty jumystardyń barlyq qujattary saqtalǵan», - dedi QR Prezıdenti arhıvi dırektory.
Qazaqstan soǵys jyldarynda Qyzyl áskerge 1,2 mln. adam jiberse, olardyń ár ekinshisi soǵysta qaza tapty. 1945 jyldyń 3 qazanynda KSRO-ǵa tutqynnan oralǵan 1 368 849 keńestik áskerı qyzmetshiniń qatarynda 23 143 qazaq bolǵan. Kórmede alǵash ret tutqynǵa túsken sarbazdardyń taǵdyrynan habar beretin fotosýretter, arhıvtik anyqtamalyqtar, tirkeý kartalary, tutqynda bolǵan áskerlerdiń jol kartalary, kúndelikteri, estelikteri, «Ekinshi dúnıejúzilik soǵystyń qazaqstandyq áskerı tutqyndary» jobasynyń 2015-2017 jj. aralyǵyndaǵy jumysynyń nátıjesi týraly aqparattar usynyldy.
