Soǵys jyldary Qazaqstanda turǵan Qytaıdyń tanymal kompozıtory týraly fılm túsirile bastady
ALMATY. QazAqparat - «Qazaqfılm» kınostýdııasy qytaı kınematografısterimen birlesip, «Kompozıtor» atty fılmdi túsirýdi qolǵa aldy, dep habarlaıdy QazAqparat kınostýdııanyń baspasóz qyzmetine silteme jasaı otyryp.
«Sh.Aımanov atyndaǵy «Qazaqfılm» AQ qytaı kınematografısterimen birlesip, «Kompozıtor» (jumys ataýy) atty fılmdi túsirýdi qolǵa aldy. Atalǵan fılmniń túsirý jumystary boıynsha kezdesý ótkizý úshin Almatyǵa arnaıy Qytaı Halyq Respýblıkasynyń tanymal rejısseri Sherızat ıAkýb bastaǵan Shineworks kınokompanııasynyń túsirý toby keldi», delingen habarlamada.
Birlesken jobany júzege asyrý týraly talqylaýlar 2015 jyly 26 qyrkúıekte Qytaıdyń Fýchjoý qalasynda ótken «Jibek Joly» kınofestıvaliniń koprodýktsııa jónindegi forýmynda bastalǵan.
2016 jyly 2 qarashada «Qazaqfılm» kınostýdııasy jáne qytaıdyń Shineworks kınokompanııasy arasynda «Kompozıtor» atty fılmdi birlesip shyǵarý jáne qarjylandyrý, sonymen qatar birlesip prokatqa shyǵarý jóninde kelisimge qol qoıyldy. 2016 jyldyń jeltoqsan aıynan bastap fılm daıyndyq kezeńge ótken bolatyn. Kartınanyń túsirý jumystary 2017 bastalyp, túsirilimderdiń negizgi bóligi Qazaqstanda ótedi.
Atalǵan fılm álemdik ónerge eleýli úles qosqan qytaıdyń tanymal kompozıtory Sı Sınhaıdyń ómiri men óner jolyna arnalmaq. Uly Otan soǵysy jyldarynda (1941- 1943 jyldar aralyǵynda) kompozıtor Qazaqstanda turyp, qazaqtyń talantty kompozıtory Baqytjan Baıqadamovpen dos bolǵan. Kartına eki el arasyndaǵy yntymaqtas pen kompozıtorlardyń dostyǵy týraly syr shertedi.
«Qazaqfılmniń» ókilderimen kezdesý barysynda fılmniń rejısseri Sherızat ıAkýb búgingi kúnge deıin biraz jumys atqarylǵanyn, Qazaqstan jaǵynan seriktesine alǵysy sheksiz ekenin aıtty.
«Qytaıda Sı Sınhaı týraly, onyń ár jyldary ómiri týraly baıandaıtyn fılmder kóp, biraq kompozıtordyń Qazaqstanda turyp, osynda jumys istegeni jóninde kóbisi bile bermeıdi. Osy elde kompozıtordy jyly qarsy alyp, onyń shyǵarmashylyǵyna qoldaý kórsetkeni týraly aıtyp berý biz úshin óte mańyzdy» - dedi ol.
«Qazaqfılm» úshin bul Qytaı kınogerlerimen jasalǵaly otyrǵan alǵashqy joba. Sondyqtan da bizdiń taraptan bul jobaǵa bilikti mamandar tartylyp otyr. Eki el arasynda yntymaqtastyq ornatý maqsatynda qolǵa alynǵan bul fılmdi abyroımen túsiremiz degen oıdamyn» - dedi Sh.Aımanov atyndaǵy «Qazaqfılm» AQ prezıdenti Baqyt Qaıyrbekov.
