«Soǵys jaǵdaıy týraly» zańda atqarýshy bıliktiń ókilettigi tolyqtyrylady - Májilis
NUR-SULTAN. QazAqparat – Parlament Májilisiniń jalpy otyrysynda «Qazaqstan Respýblıkasynyń keıbir zańnamalyq aktilerine soǵys jaǵdaıy máseleleri boıynsha ózgerister men tolyqtyrýlar engizý týraly» zań jobasy birinshi oqylymda maquldandy, dep habarlaıdy QazAqparat tilshisi.
Zań jobasynyń negizgi maqsaty – memlekettiń qorǵanysqa jáne áskerı qaýipsizdikti qamtamasyz etýge daıyndyq júıesin jetildirý, Qazaqstan Respýblıkasynyń soǵys jaǵdaıy salasyndaǵy zańnamalyq aktilerin yqtımal áskerı qaýip-qaterlerge jáne áskerı qaqtyǵystar sıpatyndaǵy ózgeristerge sáıkes keltirý. Zań jobasy Eńbek kodeksine, «Qorǵanys jáne Qarýly Kúshter týraly», «Jumyldyrý daıyndyǵy týraly», «Soǵys jaǵdaıy týraly» úsh zańǵa túzetý engizýdi kózdeıdi.
«Onyń maqsaty – memlekettiń soǵys jaǵdaıy kezeńinde jumys isteýi, sonymen qatar beıbit ýaqytta oǵan daıyndalý máselesin quqyqtyq retteý. Ásirese, «Soǵys jaǵdaıy týraly» Zańda Prezıdent ókilettigin tolyqtyrý usynylyp otyr. Ol beıbit ýaqytta iske asyrylady. Bul soǵys jaǵdaıy salasyn qoldaný tártibin aıqyndaý, Qarýly Kúshter Joǵarǵy Bas qolbasshylyǵy Stavkasy týraly, Qorǵanys keńesteri týraly, soǵys jaǵdaıy kezeńinde Úkimet qyzmetin uıymdastyrý týraly erejeni bekitý bolyp otyr», - dedi QR Qorǵanys mınıstriniń birinshi orynbasary - QR QK Bas shtabynyń bastyǵy Murat Bektanov.
Odan basqa Úkimet qyzmeti mynadaı ókilettikpen tolyqtyrady: beıbit ýaqytta soǵys jaǵdaıy kezeńindegi mınıstrlikter týraly erejeni bekitý, soǵys jaǵdaıy kezeńinde Úkimet qurylymyna kiretin memlekettik organdy soǵys ýaqytyndaǵy shtatqa kóshirýdi uıymdastyrý, jergilikti atqarýshy organǵa azamattyq jáne aýmaqtyq qorǵanys salasyn qamtamasyz etý mindetin belgileý.
«Sonymen qatar, soǵys jaǵdaıy kezeńinde jergilikti atqarýshy organnyń ókilettigin kózdeý, olarǵa «oblystyń, respýblıkalyq mańyzy bar qalanyń, astananyń qorǵanys keńesin» qurýǵa ókilettik berý usynylady. Bul rette qorǵanys keńesteri áskerı basqarý organy retinde soǵys jaǵdaıy salasynyń oryndalýyn qamtamasyz etedi. Olar tek soǵys kezeńine qurylady. Sondyqtan Qarýly Kúshter qurylymyna kirmeıdi», - dep naqtylady vedomstvo ókili.
Munymen qosa, «Qorǵanys jáne Qarýly Kúshter týraly» Zańǵa qorǵanysty josparlaý boıynsha birqatar túzetý engizý usynyldy. Olar júıeli túrde, ıaǵnı barlyq basqarý vertıkaly boıynsha qaraldy. Árbir deńgeıge tıisti ókilettik pen fýnktsııa engiziledi.
«Birinshiden, Prezıdent ókilettigin qorǵanysty josparlaý qaǵıdasyn bekitýmen tolyqtyrý usynylady. Onda jospardyń qujattar jınaǵy, memlekettik organnyń qujatty ázirleý quzyreti kózdelgen», - dedi Murat Bektanov.
