«Soǵys ýaqytyndaǵy balalar týraly» zań qabyldanýy kerek - H. Ýálıev
ASTANA. 2 maýsym. QazAqparat /Qanat Mámetqazyuly/ - «Soǵys ýaqytyndaǵy balalar jáne olardyń mártebesi týraly» zań jobasy ázirlenip, qabyldanýy kerek. Búgin QR Parlamenti Senatynyń jalpy otyrysynda Úkimet basshysynyń atyna saýal joldaǵan senator Husaıyn Ýalıev osylaı málim etti.
«Kún ótken saıyn elimizde Uly otan soǵysy ardagerleriniń ǵana emes, tyl eńbekkerleriniń qatary da sırep barady. Alaıda olardyń jeńis úshin jasaǵan qajyrly eńbekteri men batyrlyqtaryn esh umytýǵa bolmaıdy. Sol ýaqyttaǵy balalar da eresektermen qatar eńbek etip, jeńisti jaqyndatýǵa bar kúsh-jigerlerin jumsady. Tez eseıgen sol balalardyń balalyq shaǵy alasapyran zamanda ótti. Alaıda búgingi kúni olar memlekettiń nazarynan tys qalyp otyr. Tipti bizdiń elimizde «soǵys ýaqytyndaǵy balalar» atty áleýmettik sanat joq», - deıdi depýtat H. Ýálıev. Depýtattyń aıtýynsha, dál osy sanattaǵy zeınetkerlerdiń alatyn zeınetaqysy da mardymsyz. Sonymen qatar, TMD elderi arasynda atalǵan sanattaǵy azamattarǵa kómek kórsetý sharalary júzege asyp, Reseı, Belarýs, Moldova, Ýkraına sekildi elderde «Soǵys ýaqytyndaǵy balalardy áleýmettik qorǵaý týraly» zań qabyldanǵan. Zań sheńberinde 1945 jylǵy 2 qyrkúıekke deıin 18 jasqa tolmaǵan azamattarǵa áleýmettik qoldaý kórsetiledi. «Osyǵan baılanysty, «Soǵys ýaqytyndaǵy balalar jáne olardyń mártebesi týraly» zań jobasyn ázirlep, ony qabyldasaq ıgi», - dedi H. Ýálıev.
