Soǵys kezinde habarsyz ketken jaýyngerlerdiń súıekteri elge jetkizildi

ASTANA. QazAqparat – Soǵys jyldarynda qaza tapqan qazaqstandyq jaýyngerler Saparbaı Imahaev pen Dádikbaı Qultasovtyń súıekteri Qazaqstan Qarýly kúshteriniń áskerı bortymen Máskeýden Astanaǵa jetkizildi, dep habarlaıdy QazAqparat Qorǵanys mınıstrligine silteme jasap.

Qarýly kúshterdiń Memlekettik áskerı-tarıhı mýzeıinde Máskeýden Astanaǵa Qazaqstan Qarýly kúshteriniń áskerı bortymen jetkizilgen soǵys jyldarynda qaza tapqan qazaqstandyq jaýyngerler Saparbaı Imahaev pen Dádikbaı Qultasovtyń súıekterin tabystaýdyń saltanatty rásimi ótti. Rásimge Qorǵanys mınıstrliginiń basshylyǵy, qurmet qaraýyl rotasy áskerı qyzmetshileri, qoǵam ókilderi, Qarýly kúshter ardagerleri jáne qaza tapqan jaýyngerlerdiń týystary qatysty.

«Biz búgin bolashaq urpaq úshin ózderin qurban etken jaýyngerlerge qurmet kórsetip otyrmyz. Qazirgi Otan qorǵaýshylar úshin olar myqty rýhtyń, kózsiz batyrlyq pen antqa shyn berilgendiktiń úlgisi sanalady. Olardyń erligi keler urpaqtyń jadynda máńgi qalady. Іzdeý jumystaryna belsendi qatysyp, jastardy áskerı-patrıottyq tárbıeleýge zor úles qosqandarǵa Qarýly kúshter basshylyǵy atynan zor alǵysymdy bildiremin», - dedi Bas shtab bastyǵynyń orynbasary, general-maıor Asan Júsipov.

Saparbaı Imahaevtyń súıegin Novgorod oblysyndaǵy «Nahodka» jasaǵynyń izdeýshileri tapty. Ol 1916 jyly Jambyl oblysy Jýaly aýdany Jańaaýyl aýylynda dúnıege kelgen. Saıram aýdandyq áskerı komıssarıatynan soǵysqa shaqyryldy, 1943 jyldyń qańtarynda habar-osharsyz ketti.

Qyzylorda oblysy Terekúzeń aýdanynyń týmasy Dádikbaı Qultasov 1904 jyly týǵan. Ol Lenıngrad maıdanynda 136-shy atqyshtar dıvızııasynyń quramynda soǵysyp, 1942 jyldyń qyrkúıek aıynyń basynan beri habar-osharsyz ketti. Onyń súıegin Lenıngrad oblysyndaǵy shaıqas ornynan «Sývorov» jasaǵynyń izdeýshileri tapty.

«Árbir izdeýshi úshin eń bastysy – qaza tapqan sarbazdyń týystaryn tabý. Biz únemi elimizde turǵyndar, týystar men jerlester arasynda jaqyn baılanys bar dep aıtamyz. Buryndary izdeýmen aınalysatyn ózge eldegi áriptester buǵan tańdanyspen qaraıtyn. Qazir mundaı qarym-qatynastyń myqty ekenine kózderi ábden jetti», - dedi «Atamnyn Amanaty» QB basqarma tóraǵasynyń orynbasary Raıgúl Mushanova.

Sarbazdardyń súıekteri Jambyl jáne Qyzylorda oblystarynda jaýyngerlik qurmetpen qaıta jerlenedi.