Soǵys ardageri Leonıd Gırsh týraly derekti fılm jaryqqa shyqpaq

ALMATY. QazAqparat - Qazaqstanda ekinshi dúnıejúzilik soǵystyń ardageri, aqyn, jazýshy, Qazaqstan halqy Assambleıasynyń múshesi bolǵan marqum Leonıd Gırsh týraly derekti fılm jaryqqa shyqpaq. Bul týraly Almatydaǵy «Dostyq úıinde» ótken «Eshkim de, eshteńe de umytylmaıdy» atty merekelik jıynda aıtyldy, dep habarlaıdy QazAqparat tilshisi.

Jıyn barysynda maıdangerdiń qyzy Svetlana Gırsh ákesi jaıynda esteligimen bólisti.

«Ákemniń ómiriniń mańyzdy bóligi - soǵys pen Qazaqstan dep aıtar edim. Sebebi, ol soǵystyń basynan bastap, sońyna deıin júrip ótti. Soǵystan keıingi ómiriniń kóp bóligin Qazaqstanda súrdi. Men ony Qazaqstanǵa kóp nárse berdi dep aıtar edim. Sebebi, ol ózinen keıin jaqsy shyǵarmalar qaldyrdy. Ol soǵysqa qatysqan qazaqstandyqtar týraly derekter jınady, solardy basyp, jeke kitap etip jaryqqa shyǵarýdy armandady. Men ony úlken eńbek dep baǵalaımyn. Sońǵy jyldary estelik kitaptar jazýmen aınalysty, ardagerlermen kezdesip júrdi. Ákemdi eske alyp, qurmet kórsetip jatqandaryńyzǵa rahmet», - dedi Svetlana Gırsh.

«Fılııa» grek etnomádenı birlestiginiń tóraǵasy Georgıı Iordanındı Leonıd Gırsh sekildi adammen tanys bolǵanyn maqtan tutatytyn aıtty.

«Ol kópjaqty adam boldy. Onyń baı ómirbaıany týraly áli kóptegen ǵalymdar men jastar jazatyn bolady. Ózimniń dostarym sekildi men onyń shákirtimin dep esepteımin», - dedi ol.

Jıyn barysynda Leonıd Gırshqa arnalǵan derekti fılmniń qysqa úzindileri kórsetildi. Georgıı Iordanındı óz sózinde derekti fılmniń áli tolyq aıaqtalmaǵanyn atap ótti.

«Bul iske qarjylaı demeýshilik kerek bolyp tur. Sondyqtan, bul ıgi iske at salysam, qoldaý jasaımyn degen azamattar bolsa, olarǵa marhabat deımiz», - dedi ol.

Sondaı-aq, Almatyda «100-shi jeke atqyshtar brıgadasy» týraly kitaptyń tusaýy kesilgen bolatyn.