Soǵys jyldarynda Qazaqstanǵa evakýatsııalanǵandar týraly fılm prokatqa shyǵady
ALMATY. KAZINFORM – Almatyda Jeńistiń 80 jyldyǵy qarsańynda «Evakýatsııa» antısoǵystyq dramasynyń jabyq kórsetilimi ótti.
Fılm aq-qara túste, 4:3 formatynda, soǵys jyldaryndaǵy kınohronıka stılinde túsirilgen. Onyń álemdik premerasy 47-shi Máskeý halyqaralyq kınofestıvaliniń negizgi baıqaýynda ótip, qazylar alqasynyń arnaıy júldesi — «Kúmis Georgıımen» marapattaldy.
«Evakýatsııa» – Ekinshi dúnıejúzilik soǵys kezinde Qazaqstanǵa evakýatsııalanǵan beıbit turǵyndardyń taǵdyry týraly antısoǵystyq drama.
Fılmniń basty keıipkerleri — Natalıa men onyń qyzy Galıa. Olar aman qalý úshin basqa evakýatsııalanǵandarmen birge shyǵysqa qaraı jol tartady. Alaıda temirjol beketteriniń birinde Natalıa qyzynan kóz jazyp qalady. Ony tabý úshin Almatyǵa attanady.
Bul — soǵystyń sumdyǵymen betpe-bet kelgen qarapaıym adamdardyń, qandaı jaǵdaı bolmasyn mahabbat pen úmitke senimin joǵaltpaǵan jandardyń oqıǵasy.
Fılmniń rejısseri ári stsenarıı avtory Farhat Sháripovtiń aıtýynsha, jobaǵa daıyndyq 2019 jyly bastalǵan. Alaıda keıin pandemııaǵa baılanysty túsirilim toqtap, uıymdastyrý jumystary qıyndyqqa ushyraǵan. Tek birneshe jyldan keıin ǵana fılm tolyq aıaqtalǵan.
— Alǵashynda bul telehıkaıa retinde josparlanǵan edi. Biz ony túsirip, tapsyryp qoıǵanbyz. Biraq jınalǵan materıal óte kóp boldy. Sóıtip, tolyqmetrajdy fılm jasaý týraly sheshim qabyldadyq. Jumys endi bastalǵanda pandemııa bastalyp ketti. Odan keıin de túrli qıyndyqtar týyndady. Aqyry, birneshe jyl ótken soń kartınany aıaqtadyq. Keń aýqymdy premerany 19 maýsymǵa josparlap otyrmyz. Bul kún beker tańdalǵan joq — dál osy kúnderi, 1941 jyly, Ekinshi dúnıejúzilik soǵys bastalǵan edi, — dedi Farhat Sháripov.
Onyń aıtýynsha, «Evakýatsııa» — jaı ǵana soǵys týraly emes, eń aýyr zamanda da adamdyq pen meıirimdilikti saqtap qalǵan jandar jaıly hıkaıa.
Fılm Almatyda túsirilgen. Rejısserdiń aıtýynsha, soǵys jyldaryndaǵy atmosferany barynsha dál jetkizý úshin kóptegen qosymsha túsirilim jasalyp, oryndar, kostıýmder, rekvızıtter men tarıhı ǵımarattar muqııat tańdalǵan.
Eski Almaty deposy evakýatsııa kezeńindegi temirjol vokzaly retinde qaıta jasaqtalyp, keıbir bólikteri jańadan salynǵan. Sondaı-aq kórinisterdiń bir bóligi burynǵy temirjol aýrýhanasynyń qaraýsyz qalǵan ǵımaratynda jáne Almaty aýyr mashına jasaý zaýytynda (AZTM) túsirilgen.
Stsenarııge erekshe kóńil bólingen. Oǵan kóptegen maman, onyń ishinde keńesshiler de qatysqan. Negizgi derekkóz retinde soǵys jyldarynda qarapaıym adamdar — sarbazdar, tyl eńbekkerleri, evakýatsııalanǵan otbasylar — jazǵan hattar, kúndelikter men jazbalar paıdalanylǵan.
Basty rólderdi Natalıa Vıtmer, Evdokııa Skırta, Dýlyǵa Aqmolda, Altynaı Nógerbek jáne Aıjuldyz Baglanova somdaǵan.
Kastıng ashyq formatta ótip, uıymdastyrýshylar eki myńnan astam ótinim qabyldaǵan.
Farhat Sháripovtiń aıtýynsha, myqty akterlik quram jınalǵan.
— Túsirilimge Lermontov jáne Áýezov atyndaǵy teatrlardyń akterleri qatysty. Basty róldi somdaǵan Evdokııa Skırta úshin bul — úlken ekrandaǵy debıýt. Al Natalıa Vıtmer bizge Germanııadan keldi — bul erekshe jaǵdaı. Ol róldi birden sezinip, bekitildi, — dedi rejısser.
Negizgi shyǵarmashylyq toppen qatar, jappaı kórinisterge de kóp adam qatysqan. Eń aýqymdy sahnada 400-den astam adam bir mezgilde túsirilgen.
Sh.Aımanov atyndaǵy «Qazaqfılm» kınostýdııasynyń baspasóz hatshysy Gúlnar Darıbaevanyń aıtýynsha, stýdııa fılmniń jasalýyna úlken qoldaý kórsetken. Dekoratsııalar, kostıýmder, qajetti tehnıka, grım jáne ózge de mamandarmen qamtamasyz etilgen. Sonymen qatar, «Qazaqfılm» jas rejısserler men jańa kınojobalardy belsendi túrde qoldap keledi.
Osyǵan deıin bıyl 10 jańa fılm prokatqa shyǵatyny týraly jazǵan edik.