«Soǵys jáne beıbitshiliktiń» alǵashqy basylymy aýktsıonda 1,6 mln rýblge satyldy

ASTANA. KAZINFORM — Lev Tolstoıdyń áıgili «Soǵys jáne beıbitshilik» romanynyń alǵashqy basylymy Lıtfond aýktsıonynda 1,6 mln Reseı rýbline satyldy. Bul týraly uıymdastyrýshylardyń baspasóz qyzmeti habarlady.

— Lev Tolstoıdyń «Soǵys jáne beıbitshilik» romanynyń alty tomdyq alǵashqy jeke basylymy (1868–1869 j.) bastapqy 300 000 rýbl baǵasynan 1 600 000 rýblge satyldy, — delingen habarlamada.

Aýktsıon qorytyndysy boıynsha satyp alýshylar usynylǵan lottardyń 80 paıyzdan astamyn ıelendi. Jalpy satylym kólemi 35 mln rýblden asty. Uıymdastyrýshylardyń aıtýynsha, bul joǵary nátıje kollektsıonerler men mýzeı mekemeleriniń sırek kitaptarǵa, tarıhı qujattarǵa jáne avtograftarǵa degen turaqty qyzyǵýshylyǵyn dáleldeıdi.

Basqa da iri satylymdardyń qatarynda Aleksandr Pýshkınniń Borıs Godýnov pesasynyń 1831 jylǵy alǵashqy jeke basylymy bar. Ol 1,3 mln rýblge satyldy. Sondaı-aq Evgenıı Shvartstyń 1931 jylǵy sırek balalarǵa arnalǵan Ptıchıı dvor basylymy 1,2 mln rýblge ótti.

Aýktsıonǵa qatysýshylar tarıhı qujattarǵa da qyzyǵýshylyq tanytty. 1809 jylǵy, ımperator Aleksandr I qol qoıǵan bıýdjet tapshylyǵyna qatysty qujat 850 myń rýblge satyldy.

XX ǵasyrdyń birneshe sırek ádebı basylymdary da joǵary nátıje kórsetti. Atap aıtqanda, Ilıa Ilf pen Evgenıı Petrovtyń 1933 jylǵy Zolotoı telenok kitaby bastapqy 50 myń rýbl baǵasynan 950 myń rýblge satyldy. Kitap baspalyq sýperqaptamamen usynyldy.

Aıta keteıik, sırek kezdesetin Pokemon kartasy Nıý-Djersıdegi aýktsıonda satyp alýshynyń aqysyn qosqanda rekordtyq 16,49 mıllıon dollarǵa satyldy.