Soǵys jaǵdaıynda azamattardy qorǵaıtyn konteıner: Ulttyq standart ázirlendi
ASTANA. KAZINFORM – Elimizde soǵys jaǵdaıynda azamattardy qorǵaıtyn mobıldi qorǵanysh konteınerleriniń ulttyq standarty ázirlendi. Bul týraly Kazinform-nyń resmı saýalyna QR TJM joldaǵan jaýapta aıtylǵan.
— TJM bastamasy boıynsha Saýda jáne ıntegratsııa mınıstrliginiń Tehnıkalyq retteý jáne metrologııa komıteti QR ST 3981-2024 «Tótenshe jaǵdaılardaǵy qaýipsizdik. Azamattyq qorǵanystyń mobıldi qorǵanysh qurylysjaılary» ulttyq standartyn ázirledi. Bul standart 2025 jyldyń 1 tamyzynan bastap kúshine enedi.
Standart tótenshe jaǵdaılar kezinde qaýipsizdiktiń joǵary deńgeıin qamtamasyz ete otyryp, azamattyq qorǵanystyń mobıldi qorǵanysh qurylysjaılaryna qoıylatyn negizgi talaptardy, olardyń fýnktsıonaldyq sıpattamalary men tehnıkalyq jaraqtandyrylýyn reglamentteıdi, - delingen habarlamada.
Málimetke saı, belgilengen talaptarǵa sáıkes sanattalǵan uıymdar qorǵanysh qurylystaryna qajettilikti negizge ala otyryp, mobıldi qorǵanysh qurylysjaılaryn daıyndaýshy zaýyttardan ony satyp alýdy derbes júzege asyrady.
Eske salsaq, bul másele 2023 jyly kóterilgen. Sol kezdegi TJM basshysy Syrym Sháriphanov BAQ ókilderiniń saýalyna jaýap bere otyryp, parkıngter, metrolardy qorǵanys qurylysy retindegi paıdalaný múmkindikterin qarastyryp jatqanyn aıtqan. Ol úshin ǵalymdardyń kómegimen arnaıy qorǵanys konteıneri daıyndalyp, Astanadaǵy órt sóndirý beketinde qoıylǵanyn atap ótken edi.
Ázirlengen standarttyń túsindirmesinde, bundaı qorǵanys qurylysjaılary áýeli azamattyq qorǵanys sanattaryna jatqyzylǵan uıymdardyń eń kóp jumys isteıtin aýysymyn qorǵaý úshin, sondaı-aq odan ári evakýatsııalaý jaǵdaıynyń nasharlaýyna nemese ómirge qaýip tóndiretin asqynýlarǵa ákelýi múmkin tasymaldanbaıtyn naýqastardy, sondaı-aq medıtsınalyq uıymdardyń medıtsınalyq jáne qyzmet kórsetý personalyn qorǵaý úshin qurylady.
Aıta keteıik, buǵan deıin elimizdegi bombadan qorǵaý oryndarynyń 70 paıyzy jekeniń qolynda ekenin jazǵan edik.