Soǵys sarbazynyń súıegi 81 jyldan keıin Qyzylordaǵa jetkizildi
QYZYLORDA. KAZINFORM — 81 jyl buryn Reseı jerinde qaıtys bolǵan ekinshi dúnıejúzilik soǵys jaýyngeri Baıbol Rahmetovtiń múrdesi týǵan jeri Qyzylorda qalasyna ákelindi. Búgin oblys ortalyǵyndaǵy «Taǵzym» alańynda oǵan áskerı qurmet kórsetý sharasy ótti.
Qala ákimdiginiń baspasóz qyzmeti habarlaǵandaı, bıyl mamyrda izdestirý sharalary júrgizilip, 1944 jyly Pskov qalasyn nemis-fashıst basqynshylarynan azat etý kezinde qaza tapqan Qyzyl Armııa sarbazdarynyń súıekteri tabylǵan.
— Olardyń arasynda Qyzylorda qalasynyń 1917 jylǵy týmasy, 326-shy atqyshtar dıvızııasynyń 1101-shi atqyshtar polki sapynda qyzmet etken aǵa serjant Baıbol Rahmetov te bar. Ony janynan tabylǵan jaýyngerlik «Erligi úshin» medali jáne «Qyzyl Juldyz» ordeni, sondaı-aq ózi tutynǵan zattary — ustarasy, qalamsaby, áskerı pyshaǵy rastady, — delingen habarlamada.
Áskerı qurmet kórsetý rásiminde qaharman qurmetine bir mınýt únsizdik jarııalanyp, eskertkishke gúl shoqtary qoıyldy. Qala ákiminiń orynbasary Dilmuhamed Abyzov qyzylordalyq jaýyngerdiń rýhyna taǵzym etý — búgingi urpaqtyń qasıetti boryshy ekenin jetkizdi. Jaýyngerdiń baýyrlary týysyn taýyp, onyń erlik jolyn elge jetkizgen azamattarǵa alǵys bildirdi.
Batyrdyń súıegi qalaǵa qarasty Aqsýat aýyldyq okrýgine jerlendi.
Eske salsaq, Tarazda 105 jasqa qaraǵan shaǵynda Ekinshi dúnıejúzilik soǵys ardageri, maıdanger Grıgorıı Neşeretnev dúnıeden ótti.