Soǵys kezinde dala poshtasynan kelgen úshbý hattarda ne jazylǵan edi
QYZYLORDA. KAZINFORM — Qyzylorda oblysynyń arhıvinde 1941-1945 jyldar aralyǵynda dala poshtasynan kelgen hattar saqtaýly.
Jaýyngerler úshbý hatyn jerlesterin tyldaǵy eńbek qarqynyn kúsheıtýge jigerlendirý úshin jazǵan.
— 1942 jyly Qyzylorda oblystyq partııa komıtetiniń qujatynda 18/26 áskerı bóliminiń saıası basshysy Shıderovtan Qyzylorda eńbekshilerine alǵys aıtqan hat bekitilgen. Hattan oblys eńbekshileriniń «Barlyq kúsh, barlyq múmkinshilik maıdanǵa kómekke jumsalsyn!» degen uran aıasynda uıymshyldyq tanytyp, maıdanǵa kómek kórsetýge umtylǵanyn kóremiz, — deıdi Qyzylorda oblystyq memlekettik arhıvi qoǵamdyq-saıası tarıh fılıalynyń bólim basshysy Dana Qaltaeva.
Dala poshtasynan qalalyq komıtetke kelgen hatynda Qyzylorda qalasynyń turǵyny, soǵystyń alǵashqy kúnderinen bastap maıdanda bolǵan ofıtser-maıor Valentın Kravchenko Kavkazdyń Voroshılov qalasynan evakýatsııalanǵan anasynyń elge qaıtýyna kómektesýdi ótingen.
Al keıbir hat ıeleri otbasyndaǵy jaǵdaıǵa alańdap, materıaldyq turmysyn túzetýge járdemdesýdi suraǵan.
Jaýynger hattarynan elge saǵynysh qana emes, maıdan ómiri men shyndyǵy qatar seziledi. Úshbý hattar dep otyrǵanymyz — maıdan hattary. Hatty osylaı býý ekinshi dúnıejúzilik soǵys kezinde qalyptasqan.
Onyń úshburysh pishinde bolý sebebin oblystyq tarıhı-ólketaný mýzeıiniń bólim meńgerýshisi Áıgerim Bekqulıeva túsindirdi.
— Buǵan bir emes, eki sebep bolǵan. Maıdannyń qıyn jaǵdaıynda qaǵazdyń ózi tapshy bolǵan ýaqytta konvert pen mór izdep tabý múmkin bolmady. Sondyqtan poshtanyń «mobıldi» nusqasy oılap tabyldy. Hat jazý úshin qaǵaz oramasy, tipti temeki qoraby da paıdalanyldy. Hattyń arnaıy konvertke salynbaı, úsh býylýynyń taǵy bir sebebi — jaýyngerler jazǵan árbir hat áskerı tsenzýradan ótetin, — deıdi ol.
Mýzeı qyzmetkeri soǵys ýaqytynda hattyń konvertke salynýynyń nemese jaı ushburysh túrinde kelýiniń mańyzyna toqtaldy.
— Hattyń úshbý bolyp kelýi ulynyń, kúıeýiniń nemese ákesiniń tiri ekenin bildirgen. Sebebi mundaı hatty jaýyngerdiń ózi jazatyn. Eger konvertke salynǵan, mór soǵylǵan bolsa, bul — hat kelgen otbasy úshin qaraly habardyń kórinisi. Qara qaǵaz degenimiz — osy, — dedi Áıgerim Bekqulıeva.
Buǵan deıin Petropavlda soǵys ýaqytynda jumys istegen et kombınatynyń jumysshylary jospardy 6 ese artyq oryndaǵanyn jazǵanbyz.
