Soǵys aıasynda álemdegi 10 iri kompanııanyń kapıtaly 4,2 trln dollarǵa ósti
ASTANA. KAZINFORM — Soǵys bastalǵannan beri Nvidia, Alphabet, Apple jáne basqa jetekshi korporatsııalar naryqtyq qunyn aıtarlyqtaı arttyrdy. Tek Meta kompanııasy azaıǵan kórsetkish kórsetti. Bul týraly Anadoly agenttig jazdy.
AQSh/Izraıl men Iran arasyndaǵy soǵys bastalǵaly beri álemdegi naryqtyq kapıtalızatsııasy eń joǵary 10 kompanııanyń jıyntyq quny 16,69%-ǵa nemese 4 trln 183 mlrd dollarǵa ósip, 29 trln 240 mlrd dollarǵa jetti.
Jınalǵan derekterge sáıkes, 28 aqpanda AQSh pen Izraıldiń Iranǵa jasaǵan shabýyldarynan keıin bastalyp, keıin Irannyń jaýap soqqylarymen tolyqqandy soǵysqa ulasqan qaqtyǵystan beri iri álemdik korporatsııalardyń naryqtyq quny turaqsyz dınamıka kórsetken.
Naýryz aıynyń sońyndaǵy jaǵdaı boıynsha, eskalatsııaǵa deıingi deńgeımen salystyrǵanda, álemdegi eń iri 10 kompanııanyń jıyntyq kapıtalızatsııasy 4,30%-ǵa nemese 1 trln 77 mlrd dollarǵa azaıyp, 23 trln 980 mlrd dollardy quraǵan.
Іri ınvestıtsııalyq bankterdiń «satyp alý» usynystary, jasandy ıntellektke ınvestıtsııa salýǵa qatysty optımıstik kútýler jáne geosaıası táýekelderdiń tómendeýi týraly aqparattar aǵynynyń arqasynda sáýir aıynda bul kompanııalardyń jıyntyq naryqtyq quny aılyq eseppen 16,19%-ǵa nemese 3 trln 882 mlrd dollarǵa ósip, 27 trln 862 mlrd dollarǵa jetti.
Sońǵy saýda jabylýy, ıaǵnı 8 mamyrdaǵy jaǵdaı boıynsha, sáýirdiń sońymen salystyrǵanda bul kompanııalardyń quny taǵy 4,94%-ǵa nemese 1 trln 377,5 mlrd dollarǵa artty, al olardyń jalpy kapıtalızatsııasy 29 trln 240 mlrd dollardy qurady.
Osylaısha, soǵys bastalǵanǵa deıingi kórsetkishpen salystyrǵanda, bul kompanııalardyń jıyntyq quny 16,69%-ǵa nemese 4 trln 183 mlrd dollarǵa ósip, 29 trln dollardan asty.
Nvidia — 5 trln dollardan asady, Alphabet pen Apple — 4 trlnnan joǵary
Naryqtyq kapıtalızatsııasy boıynsha eń iri 10 kompanııanyń ishinde kóshbasshy — Nvidia, onyń quny 5 trln 229 mlrd dollardy quraıdy. Naýryz aıynda 67 mlrd 797 mln dollar joǵaltqanymen, sáýirde kompanııa rekord jańartyp, alǵash ret 5 trln dollar sheginen asty. Aı sońyndaǵy paıda fıksatsııasynan keıin ýaqytsha bul deńgeıden tómendegenimen, keıin qaıta qalpyna kelip, taǵy da 5 trln dollardan asty.
Nvidia-nyń eń jaqyn básekelesi — Alphabet, onyń kapıtalızatsııasy 4 trln 834 mlrd dollar. Úshinshi orynda Apple — 4 trln 309 mlrd dollar. Osylaısha, Alphabet pen Apple-diń naryqtyq quny 4 trln dollardan joǵary deńgeıge kóterilgen.
Tizimde tórtinshi orynda Microsoft — 3 trln 84 mlrd dollar, besinshi orynda Amazon — 2 trln 933 mlrd dollar tur. Al alǵashqy bestikten keıin Broadcom (2 trln 36 mlrd), TSMC (1 trln 890 mlrd), Saudi Aramco (1 trln 769 mlrd), Tesla (1 trln 609 mlrd) jáne Meta (1 trln 547,5 mlrd) ornalasqan.
Alphabet — eń kóp ósken kompanııa, tek Meta shyǵynǵa ushyraǵan
Soǵys bastalǵannan bergi dınamıkaǵa sáıkes, dollarlyq ósim boıynsha eń joǵary nátıje Alphabet kompanııasyna tıesili. Onyń naryqtyq quny osy kezeńde 1 trln 65 mlrd dollarǵa artqan.
Odan keıin Nvidia keledi — 923,6 mlrd dollar ósim. Amazon quny 679 mlrd dollarǵa, Broadcom — 521 mlrd dollarǵa, Apple — shamamen 430 mlrd dollarǵa ósken. TSMC — 234 mlrd dollar, al Microsoft shamamen 167 mlrd dollar ósim kórsetken.
Saudi Aramco quny 158 mlrd dollarǵa artsa, Tesla ósimi 98 mlrd 373 mln dollardy qurady.
Osy kezeńde quny tómendegen jalǵyz kompanııa — Meta, onyń kapıtalızatsııasy 92 mlrd 627,63 mln dollarǵa azaıǵan.
Salystyrmaly ósim boıynsha qarastyrǵanda, birinshi orynda Broadcom (34,38%), odan keıin Amazon (30,12%) jáne Alphabet (28,24%) tur.
Aıta keteıik, kerisinshe AQSh-tyń teńiz blokadasy Irandy $4,8 mlrd shyǵynǵa ushyratty.
