Soǵym naýqany bastalady: Astanada eki kún boıy et pen azyq-túlik jármeńkesi ótedi

ASTANA. KAZINFORM — 21–22 qarashada Astananyń úsh saýda alańynda «Soǵym-FEST» aýyl sharýashylyǵy jármeńkesi uıymdastyrylady. Elorda turǵyndary Aqmola, Soltústik Qazaqstan, Qostanaı jáne basqa óńirlerdiń fermerlerinen et pen ózge de otandyq ónimderdi deldalsyz, tikeleı satyp ala alady. Bul týraly AShM málim etti. 

Soǵym naýqany bastalady: Astanada eki kún boıy et pen azyq-túlik jármeńkesi ótedi
Foto: Saýda mınıstrligi

Іs-shara Aýyl sharýashylyǵy qyzmetkerleri kúnine oraılastyrylyp, aýyl sharýashylyǵy qyzmetkerleriniń III forýmynyń aıasynda uıymdastyrylady. Jármeńkege Aqmola, Soltústik Qazaqstan, Qostanaı jáne elimizdiń basqa da oblystaryndaǵy fermerlik sharýashylyqtar qatysyp, óz ónimderin usynady. Kelýshilerge otandyq aýyl sharýashylyǵy jáne azyq-túlik ónimderiniń keń assortımenti usynylady.

«Soǵym-FEST» jármeńkesiniń basty ereksheligi — ónimderdi óndirýshilerdiń tikeleı satý formaty. Bul qosymsha deldaldardy boldyrmaýǵa, fermerlerdiń ónim ótkizý múmkindikterin keńeıtýge jáne elorda turǵyndarynyń sapaly otandyq ónimderge tikeleı qol jetkizýine múmkindik beredi.

Jármeńke óńirlik ónimderdi ilgeriletýge, otandyq mal ósirýshilerdi qoldaýǵa, sondaı-aq aýyl sharýashylyǵy ónimderin óndirýshiler men tutynýshylar arasyndaǵy tikeleı baılanysty nyǵaıtýǵa arnalǵan qosymsha alańǵa aınalady.

Saýda 21 jáne 22 qarasha kúnderi saǵat 10:00–den 19:00–ge deıin Astananyń úsh alańynda qatar ótkiziledi:

«Keruen Joly» saýda ortalyǵy — Alash tasjoly, 35B.
Avtobýs baǵyttary: № 7, 11, 39, 41, 45, 53, 59, 76, 81, 82, 120, 120A, 307, 317.

«Et Álemi» saýda ortalyǵy — Alash tasjoly, 31/1.
Avtobýs baǵyttary: № 7, 11, 39, 41, 45, 53, 59, 76, 81, 82, 120, 120A, 307, 317.

«Jurt» saýda ortalyǵy — Beıbarys Sultan kóshesi, 3.
Avtobýs baǵyttary: № 2, 7, 13, 32, 42, 49, 50, 67, 73.

— Elorda turǵyndary men qonaqtaryn «Soǵym-FEST» jármeńkesine kelip, otandyq óndirýshilerdi qoldaýǵa jáne qazaqstandyq fermerlerdiń ónimderin deldalsyz, tikeleı satyp alýǵa shaqyramyz, — delingen vedomstvonyń habarlamasynda.

Buǵan deıin Astanada soǵym jármeńkesin sol jaǵalaýda ótkizý josparlanyp otyrǵanyn jazdyq.