Soǵym maýsymy: Qaraǵandy oblysynda mal urlyǵyna qarsy 19 blok-beket qoıyldy
ASTANA. KAZINFORM — Qaraǵandy oblysynda polıtsııa kúzgi soǵym maýsymy qarsańynda avtojoldardaǵy baqylaýdy kúsheıtti. Óńir aýmaǵyndaǵy respýblıkalyq jáne oblystyq mańyzy bar joldarǵa 19 jyljymaly blok-beket qoıyldy. Bul týraly Polisia.kz jazdy.
Blok-beketter 25 qyrkúıekten bastap iske qosylǵan. Mundaǵy negizgi maqsat pen mindet — mal urlyǵynyń aldyn alý, urlanǵan mal men et ónimderin tasymaldaý faktilerin der kezinde anyqtaý jáne qylmystyń jolyn kesý.
Polıtsııa qyzmetkerleri blok-beketter arqyly mal jáne et ónimderin tasymaldaıtyn kólikterdi tekserip, júktiń zańdylyǵyn rastaıtyn qujattarǵa nazar aýdarady.
— Jyljymaly blok-beketterdiń mal urlyǵynyń aldyn alýda mańyzy zor. Munda qyzmet atqaratyn polıtsııa qyzmetkerleri et tasymaldaıtyn kólikterdi toqtatyp, ónimderdiń zańdylyǵyn rastaıtyn qujattardy tekseredi. Qujattar talapqa saı bolmasa, kólik polıtsııa bólimine jetkizilip, maldyń ıesi anyqtalǵanǵa deıin tıisti tekserý júrgiziledi. Ótken jyly Temirtaý qalasynyń mańyndaǵy blok-bekette Aqmola oblysynan urlanǵan 46 bas jylqy anyqtalǵan. Bul mundaı baqylaý sharalarynyń tıimdiligin kórsetedi, — dedi Qaraǵandy oblysy polıtsııa departamenti krımınaldyq polıtsııa basqarmasy bastyǵynyń orynbasary Meıirjan Slambekov.
Polıtsııa málimetinshe, jyl basynan beri oblys aýmaǵynda mal urlyǵynyń 25 deregi tirkelip, onyń 14-i ashyldy. Sonymen qatar mal urlyǵyn turaqty túrde jasaǵan 4 qylmystyq toptyń joly kesildi. Máselen, shilde aıynda krımınaldyq polıtsııa qyzmetkerleri arnaıy operatsııa barysynda úsh adamnan turatyn qylmystyq topty ustady.
Tergeý barysynda atalǵan adamdardyń mal urlyǵynyń 7 deregine qatysy bar ekeni anyqtaldy. Qazirgi ýaqytta qylmystyq is sotqa joldandy. Blok-beketterdiń tıimdiligi ótken jylǵy nátıjelerden de kórinedi. Byltyr olardyń jumys barysynda mal urlyǵynyń 8 deregi anyqtalǵan.
Polıtsııa ókilderi kúzgi soǵym naýqany kezinde mal men et ónimderin tasymaldaý kezinde qajetti qujattardy ózimen birge alyp júrýdiń mańyzyn eskertedi. Jyljymaly blok-beketter qys túskenge deıin jumys isteıdi. Polıtsııanyń aıtýynsha, joldaǵy baqylaýdyń kúsheıýi urlanǵan maldy tasymaldaý múmkindigin shektep, qylmystyń aldyn alýǵa baǵyttalǵan.
Buǵan deıin BQO-da 36 jylqyny urlap, ońtústik óńirlerge jóneltip otyrǵan kúdikti ustalǵanyn jazǵan edik.
